নিয়মীয়া বাৰ্তা, ১৭ জুনঃ মহামাৰী ক’ৰোনা ভাইৰাছৰ ভয়াৱহ সংক্রমণৰ বাবে প্রায় তিনি মাহ বন্ধ হৈ থকা ইংলিছ প্রিমিয়াৰ লীগ কাইলৈৰ পৰা পুনৰ আৰম্ভ হ’ব৷
বিশ্বৰ সবাতোকৈ জনপ্রিয় ফুটবল লীগখন অৱশ্যে দর্শকে ষ্টেডিয়ামত বহি উপভোগ কৰিব নোৱাৰিব৷ ক’ৰোনা প্রতিৰোধী নীতি–নিয়মৰ অধীনত প্রিমিয়াৰ লীগ কর্তৃপক্ষই দর্শক অবিহনেহে প্রতিযোগিতাখন আয়োজনৰ অনুমতি দিছে৷ কাইলৈ প্রত্যাৱর্তন ঘটিবলগীয়া প্রতিযোগিতাখনৰ প্রথমখন মেচত দেখিবলৈ পোৱা যাব এষ্টন ভিলা আৰু শ্বেফিল্ড ইউনাইটেডক৷
ভিল্লা পার্কত অনুষ্ঠিত হ’বলগীয়া মেচখন ভাৰতীয় সময় অনুসৰি নিশা ১০.৩০ বজাৰ পৰা আৰম্ভ হ’ব৷ ইফালে, মানচেষ্টাৰ চিটী ১৮ জুনত আর্ছেনালৰ বিৰুদ্ধে দীর্ঘদিনৰ মূৰত পুনৰ খেলপথাৰত নামিব৷ মন কৰিবলগীয়া যে লিভাৰপুলে মানচেষ্টাৰ চিটীতকৈ ২৫ পইণ্ট অধিক লাভ কৰি এই মুহূর্তত ইংলিছ প্রিমিয়াৰ লীগৰ খিতাপ জয়ৰ শক্তিশালী দাবীদাৰ হৈ আছে৷
মহামাৰীৰ বাবে মার্চত প্রতিযোগিতাখন স্থগিত হোৱাৰ সময়ত শীর্ষস্থান লাভ কৰি থকা লিভাৰপুলে সুদীর্ঘ ৩০ বছৰৰ মূৰত ই পি এলৰ খিতাপ জয়ৰ সুৱর্ণ সুযোগ লাভ কৰিছে৷ অহা ২১ জুনৰ নিশা ১১.৩০ বজাত লিভাৰপুলে এভাৰটনৰ বিৰুদ্ধে প্রতিদ্বন্দ্বিতা আগবঢ়াব৷