নিয়মীয়া বাৰ্তা, ২৭ জুনঃ অহাবর্ষৰ জানুৱাৰী–ফেব্রুৱাৰীত অনুষ্ঠিত হ’বলগীয়া আফ্রিকা কাপ অৱ নেচনছ ফুটবল প্রতিযোগিতা স্থগিত হোৱাৰ পূর্ণ সম্ভাৱনা সৃষ্টি হৈছে৷ মহামাৰী ক’ভিড–১৯ৰ ভয়াৱহ সংক্রমণ বিশ্বৰ বিভিন্ন প্রান্তত অব্যাহত থকাৰ প্রতি লক্ষ্য ৰাখি কনফেডাৰেচন অৱ আফ্রিকান ফুটবলে প্রতিযোগিতাখন পিছুৱাই দিয়াৰ পৰিকল্পনা গ্রহণ কৰিছে৷ অহা সপ্তাহত অনুষ্ঠিত হ’বলগীয়া এক গুৰুত্বপূর্ণ বৈঠকত এই বিষয়ে চূড়ান্ত সিদ্ধান্ত ঘোষণা কৰা হ’ব৷ উল্লেখ্য যে কেমেৰুনত অনুষ্ঠিত হ’বলগীয়া প্রতিযোগিতাখন ৯ জানুৱাৰীত আৰম্ভ হৈ ৬ ফেব্রুৱাৰীত শেষ হোৱাৰ কথা আছিল৷ সম্প্রতি মহামাৰীৰ বাবে বিশ্বৰ অধিকাংশ ক্রীড়া প্রতিযোগিতা স্তব্ধ হৈ আছে৷