নিয়মীয়া বাৰ্তা ,৩০ জুলাইঃ চিৰাং জিলাৰ এগৰাকী ১৬ বছৰীয়া কিশোৰী যোৱা দহদিন ধৰি সন্ধানহীন হৈ আছে। জিলাখনৰ ঢালিগাঁও থানাৰ অন্তৰ্গত চাপাগুৰিৰ ১ নং ৱার্ড নিবাসী বিষ্ণুদেৱ প্রসাদৰ কন্যা ৰঞ্জিতা প্রসাদ যোৱা ২১ জুলাইৰ পুৱা ৯ বজাৰ পৰা নিজ গৃহৰ পৰা সন্ধানহীন হৈ আছে বুলি জানিব পৰা গৈছে।
কিশোৰীগৰাকীৰ মাতৃয়ে ২২ জুলাইত ঢালিগাঁও থানাত নিজৰ কন্যা সন্ধানহীন হোৱা বিষয়টো অৱগত কৰে। তেতিয়া ঢালিগাঁও আৰক্ষীয়ে জি ডি ই ৬১৯ নম্বৰত নিৰুদ্দেশ সম্পৰ্কীয় গোচৰ এটি ৰুজু কৰি তদন্ত অব্যাহত ৰাখিছে। আৰক্ষীয়ে কিশোৰীগৰাকীৰ সন্ধানত তদন্ত অব্যাহত ৰাখিছে যদিও আজি এই মুহূৰ্তলৈকে কিশোৰীগৰাকীৰ কোনো তথ্য তথা সন্ধান লাভ কৰিবলৈ সক্ষম হোৱা নাই। ৪ ফুট ৫ ইঞ্চি উচ্চতাৰ বগা বৰণৰ কিশোৰীগৰাকীয়ে সন্ধানহীন হোৱা মুহূৰ্তত নীলা ৰঙৰ জিনছ পেণ্ট আৰু ট’প পিন্ধি আছিল বুলি পৰিয়ালৰ লোকে জানিবলৈ দিছে। কোনো ব্যক্তিয়ে কিশোৰী গৰাকীৰ সন্ধান পালে নিকটৱৰ্ত্তী আৰক্ষী থানাত খবৰ দিবলৈ পৰিয়ালে আহ্বান জনাইছে ।