নাহৰকটীয়াত কংগ্ৰেছৰ খহনীয়া; কংগ্ৰেছীৰ শীৰ্ষ নেতৃত্বৰ প্ৰতি বিতুষ্ট হৈ দলে-বলে বিজেপিত যোগদান
- কেন্দ্ৰীয় মন্ত্ৰী ৰামেশ্বৰ তেলীয়ে জনালে আদৰণি
নিয়মীয়া বাৰ্তা, ৬ আগষ্ট : নাহৰকটীয়া সমষ্টিৰ কংগ্ৰেছ দলৰ খহনীয়াই পোনপটীয়াকৈ ভাৰতীয় জনতা পাৰ্টীৰ শক্তিৰ বৃদ্ধিত অৰিহণা যোগাইছে । সৌ-সিদিনা সমূহীয়াকৈ সমষ্টিৰ একাংশ কংগ্ৰেছ সমৰ্থকে বিজেপিৰ যুৱ নেতা তৰংগ গগৈৰ নেতৃত্বত দলটোত যোগদান কৰাৰ পাছতেই পুনৰ আজিৰ দিনটোত কংগ্ৰেছৰ একাংশ দলীয় নেতাই গেৰুৱা দলটোৰ প্ৰতি আস্হা প্ৰদৰ্শন কৰাৰ কাৰ্যই বিৰোধী দলটোক একপ্ৰকাৰ হতাশ কৰি তোলা বুলি জানিব পৰা গৈছে ।শেহতীয়াকৈ কা-বিৰোধী আন্দোলনৰ গইনা লৈ সমষ্টিৰ স্তিমিত কংগ্ৰেছ দলটোৱে হেৰুৱা ছন্দ পুনঃ ঘুৰাই আনিবলৈ তৎপৰ হোৱাৰ সময়তে দলটোৰ মজিয়াত হোৱা খহনীয়াই ভিতৰি বিভ্ৰান্ত কৰি তুলিছে কংগ্ৰেছ নেত্ৰী প্ৰণতি ফুকন সমন্বিতে দলটোক । জানিব পৰামতে কংগ্ৰেছ দলৰ শীৰ্ষ নেতৃত্বৰ একনায়কত্ববাদত বিতুষ্ট হৈ আৰু বিজেপি দলৰ নীতি আদৰ্শৰ প্ৰতি আনুগত্য প্ৰকাশেৰে নাহৰকটীয়া বিধানসভা সমষ্টিৰ কংগ্ৰেছ দলৰ শীৰ্ষ নেতৃত্ববহনকাৰীৰ পৰা আৰম্ভ কৰি তৃণমূল পয্যায়ৰ কেইবাগৰাকী নেতা- কৰ্মীয়ে ডিব্ৰুগড়ৰ সাংসদ তথা কেন্দ্ৰীয় খাদ্য আৰু সংসাধন দপ্তৰৰ ৰাজ্যিক মন্ত্ৰী
ৰামেশ্বৰ তেলীৰ দুলীয়াজান টিপলিংস্হিত বাসগৃহত উপস্থিত হৈ দলটোত যোগদান কৰে ।নৱনিযুক্ত বিজেপি ৰাজ্যিক সম্পাদক তৰংগ গগৈ, ডিব্ৰুগড় জিলাৰ বিজেপিৰ সভাপতি জগদীশ ৰাজকোঁৱৰ, সম্পাদক প্ৰীতম হাজৰিকা, শান্তিপুৰ গাওঁ পঞ্চায়তৰ সভাপতি ৰজনী বৰগোঁহাই আদি উপস্থিতিত বিজেপি দলটোত যোগদান কৰে যথাক্ৰমে কছাৰী পথাৰ পঞ্চায়তৰ প্ৰাক্তন সভাপতি নিতু সোনোৱাল, নামৰূপ মণ্ডল কংগ্ৰেছৰ সভাপতি নিতুল নাহৰ ডেকা, শান্তিপুৰ পঞ্চায়তৰ ৱাৰ্ড সদস্য কেটৰিনা ছামৰিয়া, কমল বাস্কে, নামৰূপ পঞ্চায়তৰ ৱাৰ্ড সদস্য নিৰু সোনোৱাল, নামৰূপ মণ্ডল কংগ্ৰেছৰ সহঃ সাঃ সম্পাদক পঙ্কজ গগৈ, দিঘলীয়া মণ্ডল কংগ্ৰেছৰ সহঃ সাঃ সম্পাদক কাৰ্তিক গগৈ, নামৰূপ মণ্ডল কাৰ্যনিৰ্বাহক সদস্য দিনেশ গুপ্তা, সঞ্জিৎ কুমাৰ গুপ্তা, মহিলা ব্লক কংগ্ৰেছৰ সম্পাদিকা মণিমালা শইকীয়া, এন এছ ইউ আইৰ ৰাজ্যিক সম্পাদক অভিষেক গগৈ, এন এছ ইউ আই ডিব্ৰুগড়প্ৰাক্তন সাঃ সম্পাদক সত্যজিৎ গগৈ আৰু নাহৰকটীয়া প্ৰাক্তন উপ সভাপতি ৰফিক বড়া ।নতুনকৈ যোগদান কৰা এই সদস্যসকলক গেৰুৱা বসন পিন্ধাই উষ্ম আদৰণি জনাই কেন্দ্ৰীয় ৰাজ্যিক মন্ত্ৰী ৰামেশ্বৰ তেলীয়ে ।