নিয়মীয়া বাৰ্তা, ১৩ ছেপ্টেম্বৰঃ সমাগত আই পি এলত দেখিবলৈ পোৱা যাব আমেৰিকাৰ এগৰাকী উদীয়মান বেগী বলাৰক৷ সদ্যসমাপ্ত কেৰিবিয়ান প্রিমিয়াৰ লীগত ত্রিনবাগো নাইট ৰাইডার্ছৰ হৈ চমকপ্রদ প্রদর্শন দাঙি ধৰা আলী খান নামৰ ২৯ বছৰীয়া প্রতিভাৱান বেগী বলাৰগৰাকীক আই পি এলৰ প্রাক্তন চেম্পিয়ন দল কলকাতা নাইট ৰাইডার্ছে আমন্ত্রণ জনাইছে৷
আঘাতপ্রাপ্ত হেৰী গার্নিৰ স্থানত আলী খানক কলকাতা নাইট ৰাইডার্ছে দলভুক্ত কৰিছে৷ উল্লেখ্য যে কেৰিবিয়ান প্রিমিয়াৰ লীগত আমেৰিকাৰ প্রতিভাৱান বেগী বলাৰগৰাকীয়ে আঠটা উইকেট দখল কৰিবলৈ সক্ষম হৈছিল৷ ঘণ্টাত ১৪০ কিঃমিঃ গতিৰে বল কৰিবলৈ সক্ষম আলী খানে কানাডাত অনুষ্ঠিত গ্ল’বেল টি–২০ লীগৰ লগতে বাংলাদেশ প্রিমিয়াৰ লীগ আৰু পাকিস্তান ছুপাৰ লীগতো নিয়মীয়াকৈ খেলাৰ সুযোগ পাইছে৷