নিয়মীয়া বাৰ্তা, ২০ অক্টোবৰঃ মুম্বাই ইণ্ডিয়ানছৰ বিৰুদ্ধে দেওবাৰেনিশা সুবিধাজনক স্থিতিত থকাৰ পাছতো ডাবল ছুপাৰ অভাৰ খেলিবলগীয়া হোৱা বাবে ক্রোধান্বিত হৈছিল কিংছ একাদশ পঞ্জাবৰ বিস্ফোৰক বেটছমেন ক্রিছ গেইল৷
ইউনিভার্ছ বছ হিচাপে ক্রিকেট বিশ্বত পৰিচিত ৱেষ্ট ইণ্ডিজৰ তাৰকাগৰাকীয়ে মেচৰ অন্তত কয় যে ছুপাৰ অভাৰত বেটিং কৰাৰ পূর্বে তেওঁ নার্ভাছ হোৱা নাছিল যদিও ভিতৰি ভিতৰি অত্যন্ত ক্রোধান্বিত হৈছিল৷ ‘মই চাপ অনুভৱ কৰা নাছিলোঁ, কিন্তু আমি সহজে জয়ৰ লক্ষ্যত উপনীত হ’ব পৰা মেচ এখনত ডাবল ছুপাৰ অভাৰ খেলিবলগীয়া হোৱাত মোৰ অত্যন্ত খং উঠিছিল৷ দ্বিতীয়টো ছুপাৰ অভাৰত বেটিঙৰ বাবে খেলপথাৰত নামোতে মায়ংক আগৰৱালে মোক প্রথমটো বলৰ সন্মুখীন হ’বলৈ অনুৰোধ জনোৱাত মোৰ খং দুগুণে বৃদ্ধি হৈছিল৷ তেওঁ মোক কৈছিল যে আপুনি ইউনিভার্ছ বছ আৰু বছে সদায় প্রথমটো বলৰ মুখামুখি হ’ব লাগে৷’ –গেইলে ধেমেলীয়া সুৰত এইদৰে কয়৷
উল্লেখ্য যে দ্বিতীয়টো ছুপাৰ অভাৰত পঞ্জাবক ১২ ৰানৰ প্রয়োজন থকা অৱস্থাত ইনিংছ মুকলি কৰিবলৈ আহি গেইলে প্রথমটো বলতে ছিক্সাৰ কোবাই দলটোৰ জয় সহজ কৰি তুলিছিল৷
ইফালে, প্রথমটো ছুপাৰ অভাৰত মাত্র পাঁচ ৰান ব্যয় কৰা মহম্মদ ছামিক ভূয়সী প্রশংসা কৰি ৱেষ্ট ইণ্ডিজৰ তাৰকাগৰাকীয়ে কয় যে তেওঁৰ মতে আজিৰ মেচৰ মেন অৱ দ্য মেচ হ’ল মহম্মদ ছামি৷