ডুবাইত আজি মুম্বাই ইণ্ডিয়ানছ–দিল্লীৰ মুখামুখি

নিয়মীয়া বাৰ্তা ৩১ অক্টোবৰঃ  আই পি এলৰ প্লে অফত ইতিমধ্যে স্থান সুৰক্ষিত কৰা শক্তিশালী মুম্বাই ইণ্ডিয়ানছে আজি দিল্লী কেপিটেলছৰ মুখামুখি হ’ব৷ ডুবাইত অনুষ্ঠিত হ’বলগীয়া মেচখন দিল্লীৰ বাবে মৰণপণ যুঁজসদৃশ হৈ পৰিছে৷ কিয়নো দলটোৱে একেৰাহে তিনিখন মেচত পৰাজয়ৰ সন্মুখীন হৈ বিপদত পৰিছে৷ প্লে অফত স্থান নিশ্চিত কৰিবলৈ শ্রেয়াছ আয়াৰ নেতৃত্বাধীন দলটোৰ বাবে কাইলৈ বিজয় অপৰিহার্য হৈ উঠিছে৷ শেহতীয়াকৈ কিংছ একাদশ পঞ্জাব, কলকাতা নাইট ৰাইডার্ছ আৰু ছানৰাইজার্ছ হায়দৰাবাদৰ বিৰুদ্ধে ব্যর্থ হোৱা দিল্লী কেপিটেলছে এই মুহূর্তত ১৪ পইণ্টেৰে তৃতীয় স্থানত আছে৷ প্লে অফত প্রৱেশ কৰিবলৈ দলটোৱে অৱশিষ্ট দুখন মেচৰ অতি কমেও এখনত জয়ী হ’ব লাগিব৷ মুম্বাইৰ বিৰুদ্ধে কাইলৈ মৰণপণ যুঁজত দিল্লী কেপিটেলছ সফল হ’বলৈ অধিনায়ক আয়াৰ, অ’পেনাৰ আজিংক্য ৰাহানে আৰু মিডল অর্ডাৰ বেটছমেন ঋষভ পণ্টে দীঘলীয়া ইনিংছ খেলাটো আৱশ্যক হ’ব৷ শেহতীয়াকৈ শীর্ষক্রমৰ বেটছমেনৰ ব্যর্থতাই দলটোক বিপদত পেলাইছে৷ ইফালে, ৰয়েল চেলেঞ্জার্ছ বাংগালুৰুক হৰুৱাই আত্মবিশ্বাসী হৈ থকা মুম্বাই ইণ্ডিয়ানছে আই পি এলত পুনৰ এবাৰ শক্তি প্রদর্শনৰ লক্ষ্যৰে খেলপথাৰত নামিব৷ খেলৰ সময় ঃ বিয়লি ৩.৩০ বজা৷