নিয়মীয়া বাৰ্তা, ৭ ডিচেম্বৰঃ ঘৰুৱা দল নিউজিলেণ্ডে হেমিল্টনত ৱেষ্ট ইণ্ডিজৰ বিপক্ষে অনুষ্ঠিত প্রথমখন টেষ্টত বৃহৎ ব্যৱধানত বিজয় সাব্যস্ত কৰিবলৈ সক্ষম হৈছে৷ টেষ্টখনৰ কালি চতুর্থ দিনা ভোজন বিৰতিৰ পূর্বেই নিউজিলেণ্ডে এক ইনিংছ আৰু ১৩৪ ৰানত বিজয় সাব্যস্ত কৰে৷ এই জয়েৰে দুখনীয়া টেষ্ট শৃংখলাটোত ঘৰুৱা দলটোৱে ১–০ৰ অগ্রগতি লয়৷
নিউজিলেণ্ডে ৭ উইকেটত ৫১৯ ৰান কৰি প্রথম ইনিংছ ঘোষণা কৰাৰ প্রত্যুত্তৰত ১৩৮ ৰানতে প্রথম ইনিংছ সামৰি ফল’অনৰ সন্মুখীন হোৱা ৱেষ্ট ইণ্ডিজে দ্বিতীয় ইনিংছতো বৃহৎ স্ক’ৰ সংগ্রহ কৰাত ব্যর্থ হয়৷ তৃতীয় দিনা ৬ উইকেটত কৰা ১৯৬ ৰানৰ পৰা ইনিংছ মুকলি কৰিবলৈ আহি কালি ৱেষ্ট ইণ্ডিজে ভোজন বিৰতিৰ পূর্বে ২৪৭ ৰান কৰি ইনিংছ সামৰে৷ আগদিনা ৮০ ৰান কৰি থকা ব্লেকউডে আজি ১০৪ ৰান কৰি বিদায় লয়৷
ইফালে, যোছেফে ৮৬ ৰান কৰে৷ নিউজিলেণ্ডৰ হৈ ৱাগনাৰে সর্বাধিক ৪টা উইকেট লয়৷ টেষ্টখনত দ্বিশতকীয় ইনিংছ খেলা ঘৰুৱা দলটোৰ অধিনায়ক কেন উইলিয়ামছনে শ্রেষ্ঠ খেলুৱৈৰ সন্মান লাভ কৰে৷