নিয়মীয়া বাৰ্তা, ১৬ ডিচেম্বৰঃ বিশিষ্ট নাট্যকর্মী প্রয়াত শুক্রাচার্য ৰাভাই প্রাণ প্রতিষ্ঠা কৰা গোৱালপাৰা জিলাৰ ৰামপুৰৰ বাদুংদুপ্পা কলা কেন্দ্রত আজিৰে পৰা আৰম্ভ হৈছে নাট সমাৰোহ ‘আণ্ডাৰ দ্য চাল ড্রী ২০২০’৷ পুৱা প্রয়াত শুক্রাচার্য ৰাভাৰ পত্নী ছিনা ৰাভাই আঁতধৰা উদ্বোধনী অনুষ্ঠানত বিশিষ্ট সাহিত্যিক ৰীতা চৌধুৰীয়ে নাট সমাৰোহৰ শুভ উদ্বোধন কৰে৷ উদ্বোধনী ভাষণত তেওঁ কয়– যান্ত্রিকতাৰ পৰা বহু দূৰৈত এনেদৰে প্রকৃতিৰ মাজত বিলীন হৈ নাট সমাৰোহত অংশ ল’বলৈ পাই ধন্য মানিছেছা৷ বাদুংদুপ্পা কলা কেন্দ্রক আমি সকলোৱে হাতে হাত ধৰি আগুৱাই লৈ যাব লাগিব৷ শুক্রাচার্যৰ অনুপস্থিতিত আমি সকলোৱে মিলি এই মহান অনুষ্ঠানটোক বিশ্ব দৰবাৰলৈ নি প্রতিষ্ঠা কৰিবই লাগিব৷ একাদশ বার্ষিক নাট সমাৰোহৰ আজি পুৱা ১০ বজাত প্রথমখন নাট বাদুংদুপ্পা পৰিয়ালৰ ধনঞ্জয় ৰাভাৰ ৰচনা আৰু পৰিচালনাত মঞ্চস্থ কৰা হয় ৰাভা ভাষাৰ ‘মাৰাংকাই কাপ’ নামৰ নাটকখন৷ বিয়লি ৩ বজাত মঞ্চস্থ হয় পূর্বৰংগ, গুৱাহাটীৰ গুণাকৰ দেৱ গোস্বামীৰ ৰচনা আৰু পৰিচালনাত অসমীয়া ভাষাৰ ‘ব্লেক এণ্ড হোৱাইট’৷ শালনিৰ মাজত মাটিৰ মঞ্চত মঞ্চস্থ হোৱা নাট উপভোগ কৰে বাঁহেৰে নির্মিত গেলাৰীত বহি প্রায় ৫০০ লোকে৷
লক্ষণীয় যে ৰাজ্যৰ ভিন্ন প্রান্তৰ পৰা অহা নাট্যপ্রেমীৰে এতিয়া উদুলি–মুদুলি হৈ পৰিছে বাদুংদুপ্পা কলা কেন্দ্রৰ বাকৰি৷ কাইলৈ সামৰণিৰ দিনা পুৱা ১০ বজাত মঞ্চস্থ হ’ব ক্রিয়েটৰছ হাৱ, সোণাপুৰ, কামৰূপৰ মনিমালা দাসৰ পৰিকল্পনা, ৰচনা আৰু পৰিচালনাত ‘ভূমিকন্যা’৷ বিয়লি ৩ বজাত নাট সমাৰোহৰ অন্তিমখন নাট লক্ষ্মীনাথ বেজবৰুৱাৰ সাধুৰ আধাৰত ৰচিত ‘কমলা কুঁৱৰীৰ সাধু’ মঞ্চস্থ হ’ব৷ নাটকখনৰ নাট্যৰূপ নর্থ ইষ্ট থিয়েটাৰৰ একাডেমী, ডেৰগাঁও, অসমৰ ড০ পৰমানন্দ ৰাজংবশীৰ আৰু পৰিচালনা কৰিছে সীমান্ত ফুকনে৷ প্রয়াত শুক্রাচার্য ৰাভাৰ ধাৰা অব্যাহত ৰাখি তেওঁৰ পত্নী ছিনা ৰাভা আৰু তেওঁৰ শিষ্যসকলে পূর্বৰ দৰেই প্রাকৃতিক পৰিৱেশক প্রাধান্য দি অনুষ্ঠিত কৰিছে নাট সমাৰোহ৷ দুদিনীয়া নাট সমাৰোহ উপলক্ষে উদুলি–মুদুলি হৈ পৰিছে বাদুংদুপ্পা কলা কেন্দ্রৰ বাকৰি৷ উল্লেখ্য যে বাদুংদুপ্পা কলা কেন্দ্রই প্রতিবছৰে অনুষ্ঠিত কৰা নাট সমাৰোহত নাথাকে কৃত্রিমতা৷ ইয়াৰ বিপৰীতে থলুৱা বাদ্যযন্ত্রক প্রাধান্য দি বৈদ্যুতিক পোহৰ, মাইক, স্পার্ক আদি অবিহনে শালনিৰ মাজত মাটিৰ মঞ্চত মঞ্চস্থ কৰা হয় নাটক৷