নিয়মীয়া বাৰ্তা, ১৬ ডিচেম্বৰঃ আফ্রিকান ৰাষ্ট্র নাইজেৰিয়াৰ উত্তৰ–পশ্চিম প্রান্তৰ কাটছিনা প্রদেশৰ পৰা যোৱা সপ্তাহত কেইবাশও স্কুলীয়া শিক্ষার্থীক অপহৰণ কৰাৰ ঘটনাত জড়িত আছে দেশখনৰ কুখ্যাত ইছলামিষ্ট জেহাদী সংগঠন বকো হাৰাম৷ বকো হাৰামে এই অপহৰণৰ দায়িত্ব স্বীকাৰ কৰিছে৷
স্মর্তব্য যে পূর্বে প্রশাসনে ডকাইত তথা অপৰাধী চক্রই স্কুলীয়া ছাত্র–ছাত্রীসকলক অপহৰণ কৰা বুলি সন্দেহ কৰিছিল৷ বহু ছাত্র–ছাত্রীয়ে অপহৰণকাৰীৰ কবলৰ পৰা পলায়ন কৰিছে যদিও এতিয়াও তিনি শতাধিক ছাত্র–ছাত্রী সন্ধানহীন হৈ আছে অঞ্চলটোত৷ স্মর্তব্য যে কুখ্যাত ইছলামিষ্ট জেহাদী সংগঠন বকো হাৰামে ২০১৪ চনত চিব’ক চহৰৰ পৰা বহু কিশোৰী ছাত্রীক অপহৰণ কৰি বিশ্বজুৰি আলোড়ন সৃষ্টি কৰিছিল৷
শেহতীয়া ঘটনা সন্দর্ভত বকো হাৰামৰ নেতা আবু বকৰ ছেকাউৱে এক অডি’ বার্তাত উল্লেখ কৰিছে যে কাটছিনাৰ ঘটনাৰ দায়িত্ব সংগঠনটোৱে স্বীকাৰ কৰিছে৷ স্মর্তব্য যে নাইজেৰিয়াত পাশ্চাত্যৰ শিক্ষাৰ বিৰোধিতা কৰি আহিছে বকো হাৰামে৷ চলিত বর্ষটোত নাইজেৰিয়াৰ উত্তৰ–পশ্চিম প্রান্তত বকো হাৰামৰ হাতত নিহত হৈছে কেইবাশও লোক৷ প্রশাসনে এই হত্যাকাণ্ডৰ ঘটনাৰ বাবে অপৰাধী চক্রক জগৰীয়া কৰি আহিছে যদিও আন্তর্জাতিক বহু সংস্থাই ইয়াৰ অন্তৰালত বকো হাৰাম জড়িত থকা বুলি দাবী কৰি আহিছে৷ স্মর্তব্য যে ২০০৯ চনৰে পৰা ইছলামিষ্ট জেহাদী সংগঠন বকো হাৰামে নাইজেৰিয়াত সৃষ্টি কৰি আহিছে অবাধ ৰক্তপাত।