নিয়মীয়া বার্তা, ২৭ ডিচেম্বৰঃ নতুন ৰূপ লৈ ক’ভিড–১৯ ভাইৰাছে বিশ্বজুৰি পুনৰ ভয়াৱহ ৰূপ ধাৰণ কৰিছে৷ ইংলেণ্ডত বিৱর্তিত হোৱা নতুন ৰূপৰ ভাইৰাছবিধে ইতিমধ্যে অসমত প্রৱেশ কৰিছে৷ মিউটেটেড ক’ৰোনা ভাইৰাছৰ উপস্থিতি ধৰা পেলাবলৈ কৰা পৰীক্ষাৰ ক্ষেত্রত এগৰাকী অসম সন্তানে গুৰুত্বপূর্ণ অৱদান আগবঢ়াইছে৷ তিনিচুকীয়াৰ যুৱক শুভাঞ্জন ভৌমিকে মানুহৰ দেহত নতুন ৰূপৰ ক’ৰোনা ভাইৰাছৰ উপস্থিতি ধৰা পেলাবলৈ এটা অভিনৱ পৰীক্ষা পদ্ধতি উদ্ভাৱন কৰি উলিয়াইছে৷
ভৌমিকে জনোৱা মতে, তেওঁলোকে প্রস্তুত কৰা টেষ্ট কিটটোৱে শেহতীয়া প্রকাৰৰ ভাইৰাছ আৰু ভৱিষ্যতে বিৱর্তনৰ ফলত সৃষ্টি হোৱা নতুন প্রকাৰৰো ধৰা পেলাবলৈ সক্ষম হ’ব৷ ভৌমিক সম্প্রতি মুম্বাইৰ বেনকছ ৰিছার্চ প্রাইভেট লিমিটেডৰ নির্দেশক হিচাপে কর্মৰত৷ তেওঁৰ প্রতিষ্ঠানটোৱে আই চি এম আৰ, এন আই আৰ আৰ এইচৰ লগত সহযোগিতাৰে এই টেষ্ট কিট প্রস্তুত কৰিছে৷
বাংগালুৰুৰ ইণ্ডিয়ান ইনষ্টিটিউট অৱ ছায়েন্সৰ প্রাক্তন ছাত্র ভৌমিকৰ মতে, প্রতিষেধক প্রদানৰ সমান্তৰালভাৱে ক’ভিড–১৯ৰ পৰীক্ষাও চলি থাকিব৷ গতিকে এটা আনটোৰ পৰিপূৰক হ’ব৷ তেওঁ লগতে কয় যে স্বাস্থ্যজনিত জৰুৰীকালীন পৰিস্থিতিৰ বাবে প্রতিষেধক প্রস্তুত কৰিবলৈ প্রতিষ্ঠানসমূহে প্রয়োজনীয় সময় নাপালে৷
অতি কম সময়ৰ ভিতৰত প্রস্তুত কৰিবলগীয়া হোৱা বাবে ভেকচিনসমূহ ১০০ শতাংশই কার্যক্ষম হোৱাৰ নিশ্চয়তা দিব নোৱাৰি৷ তদুপৰি প্রতিষেধক প্রদানৰ প্রক্রিয়া দীঘলীয়া আৰু সম্পূর্ণ হওঁতে বহু বছৰ লাগি যায়৷ গতিকে এটা ফলপ্রসূ পৰীক্ষা প্রণালীৰ সদায় প্রয়োজন হ’ব৷ এইক্ষেত্রত ভৌমিকে প্রস্তুত কৰা টেষ্ট কিটটো বহুক্ষেত্রত আন দিশতকৈ পৃথক হ’ব বুলিও তেওঁ দাবী কৰে৷ উল্লেখ্য যে তিনিচুকীয়াৰ চলিহা নগৰৰ দীপক ভৌমিক আৰু দেৱী ভৌমিকৰ পুত্র শুভাঞ্জন ভৌমিকে দিল্লী বিশ্ববিদ্যালয়ৰ ছেইণ্ট ষ্টিফেন্স কলেজ আৰু বায়’টেকন’লজী জামিয়া হামদাউৰ পৰাও শিক্ষা গ্রহণ কৰিছে৷