নিয়মীয়া বাৰ্তা ৩০ ডিচেম্বৰঃ চলিত ইংৰাজী ২০২০ বর্ষটো শেষ হ’বলৈ মাজতে আৰু মাত্র দুটা দিন বাকী থকা অৱস্থাতেই গুৱাহাটী মহানগৰীৰ পশ্চিম প্রান্তত চলিল কামৰূপ মহানগৰ জিলা প্রশাসনৰ উচ্ছেদ অভিযান৷
উল্লেখনীয় যে ৰাজধানী মহানগৰী গুৱাহাটীৰ ভিন্ন স্থানৰ সমান্তৰালকৈ মহানগৰীৰ পশ্চিম প্রান্তত অধিকাংশ অসাধু লোকে ৰাষ্ট্রীয় ঘাইপথৰ দাঁতিৰ চৰকাৰী ভূমিত দোকান–পোহাৰ দি মূলপথটো সংকুচিত কৰি পেলাইছে৷ যাৰ ফলত মহানগৰীৰ জালুকবাৰীৰ পৰা খানামুখলৈ গুৱাহাটী পৌৰ নিগমৰ অধীনৰ এই অঞ্চল বিশেষতঃ মহানগৰ জিলা প্রশাসনে চলায় একব্যাপক উচ্ছেদ অভিযান৷ জালুকবাৰীৰ পৰা খানামুখপর্যন্ত ৰাষ্ট্রীয় ঘাইপথৰ দাঁতিত অকর্তৃত্বশীলভাৱে স্থাপন কৰা প্রায় শতাধিক দোকান পোহাৰ এক্সকেভেটৰৰ সহায়ত উচ্ছেদ কৰে কামৰূপ মহানগৰ জিলা প্রশাসনে৷ অভিযান কালত মহানগৰীৰ খানামুখ, লংকেশ্বৰ, সাতমাইল, জালুকবাৰী আদি স্থানৰ অবৈধ দোকান পোহাৰসমূহ ভাঙি দিয়ে৷
জানিব পৰা মতে গুৱাহাটী উচ্চ ন্যায়ালয়ৰ নির্দেশ অনুসৰিয়ে প্রশাসনে চলায় এই উচ্ছেদ অভিযান৷ কামৰূপ মহানগৰ জিলাৰ চক্র বিষয়া (সংলগ্ণ)বৰণ্য বৰঠাকুৰৰ নেতৃত্বত সম্পন্ন হয় এই উচ্ছেদ অভিযান৷ উল্লেখ্য যে মহানগৰীৰ বিভিন্ন চৰকাৰী ভূমিত একাংশ দুষ্টচক্রই বেদখল কৰি ব্যৱসায় চলাই আহিছে৷ চৰকাৰী ভূমি বেদখলমুক্ত কৰাৰ বাবে ন্যায়ালয়ে দিয়া নির্দেশনাৰ ভিত্তিত কামৰূপ মহানগৰ জিলা প্রশাসনে আজি চলায় উচ্ছেদ অভিযান৷