নিয়মীয়া বাৰ্তা, ৭ জানুৱাৰীঃ ভাৰত আৰু অষ্ট্রেলিয়াৰ মাজত কাইলৈৰ পৰা আৰম্ভ হ’বলগীয়া তৃতীয় টেষ্টত চতুর্থ আম্পায়াৰ হিচাপে থাকিব এগৰাকী মহিলা মেচ অফিচিয়েল৷ পুৰুষৰ টেষ্ট ক্রিকেটত প্রথমগৰাকী মহিলা হিচাপে চতুর্থ আম্পায়াৰৰ দায়িত্ব লাভ কৰা এইগৰাকী মেচ অফিচিয়েল হ’ল অষ্ট্রেলিয়াৰ ক্লেয়াৰ পোল’ছাক৷ নিউ ছাউথৱেলছৰ ৩২ বছৰীয়া পোল’ছাকে ইয়াৰ পূর্বে ২০১৯ত নামিবিয়া আৰু ওমানৰ মাজত অনুষ্ঠিত আই চি চিৰ ডিভিজন ২ লীগত পুৰুষৰ এদিনীয়া আন্তঃৰাষ্ট্রীয় মেচৰ প্রথমগৰাকী মহিলা হিচাপে ফিল্ড আম্পায়াৰৰ দায়িত্ব পালন কৰিছিল৷
উল্লেখ্য যে ভাৰত আৰু অষ্ট্রেলিয়াৰ মাজত কাইলৈৰ পৰা ছিডনীত আৰম্ভ হ’বলগীয়া তৃতীয় টেষ্টত অনফিল্ড আম্পায়াৰৰ দায়িত্বত থাকিব প’ল ৰাফেল আৰু প’ল উইলছন৷ একেদৰে টিভি আম্পায়াৰৰ ভূমিকা পালন কৰিব ব্রাউছ অক্সেনফ’র্ডে৷ মেচ ৰেফাৰী হিচাপে থাকিব অষ্ট্রেলিয়াৰ ডেভিদ বোন৷