নিয়মীয়া বাৰ্তা, ১৮ ফেব্ৰুৱাৰীঃ আজি আইপিএলৰ নিলাম প্ৰক্ৰিয়া চলি আছে। মুঠ ২৯২ জন ক্রিকেটাৰৰ ভাগ্য নির্ধাৰণ কৰি চেন্নাইত চলি আছে এই নিলাম প্ৰক্ৰিয়া। ইতিমধ্যে সমাপ্ত হৈছে প্রথম ৰাউন্ডৰ নিলাম।
ৰাজস্থান ৰয়েলছে অভিলেখ গঢ়ি ১৬ কোটি ২৫ লাখ টকাত ক্ৰয় কৰিছে দক্ষিণ আফ্রিকাৰ পেছাৰ ক্রিছ মৰিছক। আইপিএলৰ ইতিহাসত সর্বাধিক দামত বিক্রী হৈছে মৰিছ। মৰিছক লৈ ৰাজস্থান ৰয়েলছৰ লগত পাঞ্জাৱ কিংছে দৰ উঠাই যদিও অৱশেষত ৰয়েলছে অধিক ধনৰ বিনিময়ত লাভ কৰে মৰিছক। মৰিছক ক্ৰয় কৰাৰ বাবে আন ফেঞ্চাইজিয়েও আগ্ৰহ প্ৰকাশ কৰিছিল যদিও দৰ দেখি সকলো তল পৰে।
আনহাতে, গ্লেন মেক্সৱেলক ১৪ কোটি ২০ লাখ টকাত ক্ৰয় কৰে বিৰাট কোহলিৰ আৰচিবিয়ে। গ্লেন মেক্সৱেলৰ বাবে ৰাজস্থান ৰয়েলছ আৰু কলকাতা নাইট ৰাইডাৰ্ছে দৰ উঠাইছিল যদিও আৰ চি বিয়ে ক্ৰয় কৰে। ইয়াৰ লগতে শিৱম ডুবেক ক্ৰয় কৰে ৪ কোটি ৪০ লাখত ৰাজস্থান ৰয়েলছে। কলকাতা নাইট ৰাইডাৰ্ছে ৩ কোটি ২০ লাখত কিনিছে বাংলাদেশৰ অলৰাউন্ডাৰ ছাকিব আল হাছানক।