নিয়মীয়া বাৰ্তা, ২১ ফেব্রুৱাৰীঃ ভ্রমণকাৰী দল ইংলেণ্ডৰ বিপক্ষে খেলিবলগীয়া আসন্ন টি–২০ শৃংখলাটোৰ বাবে আজি ভাৰতীয় দলটো ঘোষণা কৰিছে৷ ঘোষিত দলটোলৈ উইকেটকীপাৰ বেটছমেন ঋষভ পণ্টৰ প্রত্যাৱর্তন ঘটাৰ লগতে সূর্যকুমাৰ যাদৱ, ঈশান কিষণ আৰু ৰাহুল তেৱাটীয়াক দলটোলৈ আমন্ত্রণ জনাইছে৷
২০২০ চনৰ আই পি এল আৰু ঘৰুৱা ক্রিকেটত দাঙি ধৰা দুর্দান্ত প্রদর্শনৰ বাবেই এই তিনিগৰাকী খেলুৱৈক টি–২০ দলটোত অন্তর্ভুক্ত কৰিছে৷ ইপিনে ঘোষিত দলটোৰ পৰা বাদ পৰিছে উইকেটকীপাৰ বেটছমেন সঞ্জু ছেমছন৷
তাৰকা পেচ বলাৰ ভুবনেশ্বৰ কুমাৰৰ প্রত্যাৱর্তন ঘটিছে যদিও যশপ্রীত বুমৰাহক বিশ্রাম দিয়া হৈছে৷ টি–২০ শৃংখলাৰ বাবে ঘোষিত ভাৰতীয় দলটো হ’ল– কোহলি (অধিনায়ক), ৰোহিত (সহঃ অধিনায়ক), ৰাহুল, ধাৱন, শ্রেয়াছ, সূর্যকুমাৰ, হার্দিক, ঋষভ, ঈশান, য়ুজবেন্দ্র চাহাল, বৰুণ চক্রৱর্তী, অক্ষৰ পেটেল, ৱাশ্বিংটন, তেৱাটীয়া, নটৰাজন, ভুবনেশ্বৰ, দীপক চহৰ, নৱদীপ ছাইনী আৰু ছার্দুল ঠাকুৰ৷