নিয়মীয়া বাৰ্তা, ৫ মাৰ্চঃ দুলীয়াজান সমষ্টিত আজি আনন্দৰ বন্যা। আনুষ্ঠানিকভাৱে দলীয় শীৰ্ষ নেতৃত্বই ঘোষণা নকৰিলেও বিজেপিৰ বিধায়ক তেৰছ গোৱালাই তীব্ৰ প্ৰত্যাহ্বানৰ মাজতো টিকট লাভ কৰা খবৰে সমষ্টিৰ দলীয় কৰ্মীৰ মাজত আনন্দৰ সোঁত বোৱাইছে।
আজি শুকুৰবাৰে দুপৰীয়া ডিব্ৰুগড় বিমানবন্দৰৰ পৰা তেৰছ গোৱালাক দলীয় কৰ্মীসকলে আদৰি অনাৰ লগতে টেঙাখাট, টিংৰাই, দুলীয়াজান, ভাদৈ আদি সমগ্ৰ অঞ্চলত ঠায়ে ঠায়ে দলীয় কৰ্মীসকলে গামোচা, ফুলেৰে উষ্ম আদৰণি জনায়।
টিকট লাভ কৰা আনন্দ-উৎসৱৰ মাজতেই তেৰছ গোৱালাই কংগ্ৰেছ আৰু অসম জাতীয় পৰিষদৰ সৈতে বন্ধুত্বমূলকভাৱে এইবাৰ প্ৰতিদ্বন্দ্বিতা আগবঢ়োৱাৰ কথা ব্যক্ত কৰিছে।
অৱশ্যে পূৰ্বতকৈ বিপুল ভোটত জয়ী হোৱাৰ দাবী কৰিছে তেৰছ গোৱালাই।