চামগুৰি সমষ্টিৰ বিজেপি প্ৰাৰ্থী অনিল শইকীয়া মনোনয়ন পত্ৰ দাখিল

নিয়মীয়া বাৰ্তা ৯ মাৰ্চ :- প্ৰথম পৰ্যায়ৰ বিধানসভা নিৰ্বাচনৰ বাবে নগাঁও জিলাৰ চামগুৰি সমষ্টিৰ মিত্ৰজোঁটৰ হৈ বিজেপি প্ৰাৰ্থী অনিল শইকীয়া কংগ্ৰেছ নেতৃত্বাধীন মহাজোঁটৰ তথা কংগ্ৰেছ দলৰ প্ৰাৰ্থী ৰকিবুল হুছেইন আৰু অসম জাতীয় পৰিষদৰ প্ৰাৰ্থী আবেদুৰ ৰহমানে আজি নগাঁও উপায়ুক্ত কাৰ্যালয়ত মনোনয়ন – পত্ৰ দাখিল কৰে ৷মনোনয়ন প্ৰত্ৰ দাখিল কৰাৰ পূৰ্বে বিজেপি দলৰ প্ৰাৰ্থী অনিল শইকীয়াই নিজা গাৱঁৰ নামঘৰত আইমাতৃ আৰু ভকত- বৈষ্ণৱৰ আৰ্শীবাদ লয় ৷পৰৱৰ্তী সময়ত কলিয়াবৰ জিলা বিজেপিৰ মুখ্য কাৰ্যালয়ত উপস্থিত হৈ হাজাৰ হাজাৰ দলীয় নেতা-কৰ্মী আৰু সমৰ্থকৰ লগত শোভাযাত্ৰা কৰি নগাঁও জিলা উপায়ুক্ত কাৰ্যালয়ত উপস্থিত হৈ প্ৰথম বাৰৰ বাবে মনোনয়ন পত্ৰ দাখিল কৰে ৷

বিজেপি মিত্ৰজোঁটৰ প্ৰাৰ্থী অনিল শইকীয়াই মনোনয়ন পত্ৰ দাখিল কৰাৰ সময়ত অসম গণ পৰিষদৰ হৈ মনিমাধৱ মহন্ত আৰু বাজিয়াগাওঁ মণ্ডল বিজেপিৰ সভাপতি প্ৰানজিৎ বৰাই সংগ দিয়ে ৷আনহাতে চামগুৰি সমষ্টিৰ বিধায়ক তথা প্ৰাক্তন মন্ত্ৰী ৰকিবুল হুছেইনেও কংগ্ৰেছ নেতা কৰ্মী আৰু সমৰ্থকৰ সহ এক বিশাল সমদল কৰি মনোনয়ন পত্ৰ দাখিল কৰাৰ লগতে অসম জাতীয় পৰিষদৰ মনোনীত প্ৰাৰ্থী আবেদুৰ ৰহমানেও আজি নগাঁও জিলা উপায়ুক্তৰ কাৰ্যালয়ত মনোনয়ন প্ৰত্ৰ দাখিল কৰে বুলি জানিব পৰা গৈছে৷