নিয়মীয়া বাৰ্তা, ১১ মার্চঃ কোকৰাঝাৰৰ সাংসদ নৱ কুমাৰ শৰণীয়া নেতৃত্বাধীন গণ সুৰক্ষা পার্টী (জি এছ পি) বর্তমান ইউ পি পি এল–বিজেপিৰ লগত একেলগে বিটিচিত চৰকাৰ চলাই আছে৷ পিছে বিটিচিত ইউ পি পি এল–বিজেপিৰে মিত্রতা কৰি চৰকাৰ চলাই থাকিলেও এইবাৰ বিধানসভা নির্বাচনত শৰণীয়াই বৰমা সমষ্টিৰ পৰা নির্দলীয় প্রার্থী হিচাপে অৱতীর্ণ হ’ব৷
সাংসদ শৰণীয়াই সংবাদ মাধ্যমৰ আগত এই মন্তব্য কৰি কয় যে বৰমা সমষ্টিত তেওঁ নির্দলীয় হিচাপে প্রতিদ্বন্দ্বিতা আগবঢ়াব৷ বিজেপি–জি এছ পিৰ বেনাৰত তেওঁ নির্বাচনত অৱতীর্ণ নহয়৷
সমষ্টিটোত ইউ পি পি এলৰ দলীয় প্রার্থী থাকিব পাৰে বুলি উল্লেখ কৰি তেওঁ কয় যে ইউ পি পি এলৰ প্রার্থী থাকিলেও তেওঁ নির্বাচনত অৱতীর্ণ হ’ব৷ ২০১৬ চনৰ নির্বাচনতো তেওঁক বিধানসভালৈ আহিবলৈ সমর্থকসকলে অনুৰোধ জনাইছিল৷
কিন্তু তেতিয়া বিটিচিত অধিকাৰকে ধৰি বিভিন্ন সমস্যা থকাৰ বাবে সেইবাৰ নির্বাচনী যুঁজত অৱতীর্ণ হোৱা নাছিল৷ এতিয়া যিহেতু সমস্যাসমূহ সমাধান হৈছে, সেয়ে তেওঁ এইবাৰ বিধানসভাত নির্বাচন খেলাৰ সিদ্ধান্ত গ্রহণ কৰিছে৷ নির্বাচনত তেওঁ ইউ পি পি এলকে ধৰি বিভিন্ন দলৰো সমর্থন লাভ কৰিব বুলি আশা ব্যক্ত কৰে৷