নিয়মীয়া বাৰ্তা ১৩ মাৰ্চঃ বিশ্বৰ আটাইতকৈ ধনী ব্যক্তিৰ অন্যতম এমাজ’নৰ স্বত্বাধিকাৰী জেফ বেজ’ছ আৰু টেছলাৰ স্বত্বাধিকাৰী এল’ন মাস্কতকৈও চলিত বর্ষত অধিক উপার্জনকাৰী ব্যক্তি হিচাপে বিবেচিত হৈছে ভাৰতীয় ব্যৱসায়ী গৌতম আদানি৷ আদানি গ্রুপৰ অধ্যক্ষ গৌতম আদানিৰ মুঠ সম্পত্তিৰ পৰিমাণ চলিত বর্ষত ১৬.২ বিলিয়ন ডলাৰৰ পৰা ৫০ বিলিয়ন ডলাৰলৈ বৃদ্ধি পাইছে৷ এই তথ্য প্রকাশ কৰিছে ব্লুমবার্গ বিলিয়নার্ছ ইনডেক্সে৷ তেওঁলোকে প্রকাশ কৰা অনুসৰি চলিত বর্ষত সম্পত্তি আহৰণৰ ক্ষেত্রত এল’ন মাস্ক আৰু জেফ বেজ’ছক অতিক্রম কৰিছে আদানিয়ে৷ মাস্কে চলিত বর্ষত বর্তমানলৈ মাত্র ১০.৩ বিলিয়ন ডলাৰ সম্পত্তি নতুনকৈ আহৰণ কৰিবলৈ সক্ষম হৈছে৷ ইয়াৰ বিপৰীতে বেজ’ছৰ সম্পত্তি ৭.৫৯ বিলিয়ন হ্রাস পাইছে৷ ক’ভিড মহামাৰীৰ সময়তে এই সম্পত্তিৰ পৰিমাণ বৃদ্ধি পাইছে গৌতম আদানিৰ৷ ইয়াৰ লগে লগে বর্তমান আদানি বিশ্বৰ ২৬সংখ্যক আটাইতকৈ ধনী ব্যক্তি হিচাপে পৰিণত হৈছে৷ আদানি গ্রুপে ইয়াৰ ব্যৱসায় অতি দ্রুতগতিৰে সম্প্রসাৰণ কৰিছে৷