ঃনিয়মীয়া বাৰ্তা, ১৬ মাৰ্চঃ পর্তুগালৰ তাৰকা ফুটবলাৰ ক্রিষ্টিয়ানো ৰ’নাল্ডোৱে দেওবাৰে নিশা ইটালীয়ান লীগ ছিৰি এত কাগলিয়াৰিৰ বিপক্ষে হেটট্রিক অর্জন কৰে৷ মেচখনত হেটট্রিক অর্জন কৰাৰ লগে লগে জুভেণ্টাছৰ ক্রিষ্টিয়ানো ৰ’নাল্ডোৱে কিংবদন্তি খেলুৱৈ ব্রাজিলৰ পেলেৰ সর্বাধিক গ’লৰ অভিলেখটো ভংগ কৰে৷ ৰ’নাল্ডোৱে এতিয়ালৈকে ৭৭০টা গ’ল কৰিবলৈ সক্ষম হৈছে৷ বিপৰীতে কিংবদন্তি পেলেই ৭৬৭টা স্ক’ৰ কৰিবলৈ সক্ষম হৈছিল৷ পেলেৰ অভিলেখটো ভংগ কৰি ৰ’নাল্ডোৱে কয় যে পেলেতকৈ কোনো ডাঙৰ খেলুৱৈ নাই৷ তেওঁৰ অভিলেখ ভংগ কৰাটো এক সন্মানৰ কথা৷ ইপিনে, ৰ’নাল্ডোৱে তেওঁৰ অভিলেখটো ভংগ কৰাৰ লগে লগে পেলেই পর্তুগালৰ খেলুৱৈগৰাকীক অভিনন্দন জনায়৷ যোৱানিশা কাগলিয়াৰিত অনুষ্ঠিত গুৰুত্বপূর্ণ মেচখনত জুভেণ্টাছে ৰ’নাল্ডোৰ হেটট্রিকৰ সহায়ত ঘৰুৱা দল কাগলিয়াৰিক ৩–১ গ’লত পৰাস্ত কৰি সম্পূর্ণ পইণ্ট অর্জন কৰে৷ ১০, ২৫ আৰু ৩২ মিনিটত ৰ’নাল্ডোৱে গ’ল স্ক’ৰ কৰি হেটট্রিক অর্জন কৰে৷ ইপিনে, ৬১ মিনিটত কাগলিয়াৰিয়ে গ’ল স্ক’ৰ কৰি মেচখনত পৰাজয়ৰ ব্যৱধান ৩–১লৈ হ্রাস কৰে৷ জুভেণ্টাছে এতিয়ালৈকে ২৬খন মেচৰ পৰা ৫৫ পইণ্ট সংগ্রহ কৰি পইণ্ট তালিকাৰ তৃতীয় স্থানত আছে৷