নিয়মীয়া বাৰ্তা ১৬ মাৰ্চঃ কৃষক মুক্তি সংগ্রাম সমিতি আৰু ৭০ সংগঠনৰ ঔৰসত জন্মলাভ কৰা ৰাইজৰ দলৰ পৰা সমর্থন প্রত্যাহাৰ কৰিছে বৃহত্তৰ অসমীয়া যুৱ মঞ্চই৷ দলটোৰ মাজত দেখা দিয়া খাম–খেয়ালিত ক্ষুণ্ণ হৈ অসমীয়া যুৱ মঞ্চই এই সমর্থন প্রত্যাহাৰ কৰিছে৷ আজি এই কথা সদৰী কৰিছে সংগঠনটোৰ কেন্দ্রীয় সচিবপ্রধান প্রণৱজ্যোতি গগৈয়ে৷ দিছপুৰ প্রেছ ক্লাবত এখন সংবাদ মেলত তেওঁ কয়– ‘ৰাজনৈতিকভাৱে গঠন হোৱাৰ পাছত ৰাইজৰ দলৰ চিন্তাধাৰা সলনি হ’ল৷ অখিল গগৈ কাৰাগাৰত থকাৰ সময়ত দলটোৰ একাংশ নেতাই যি বিলাসী জীৱন যাপন কৰিছে, তাক লৈ আমি অসন্তুষ্ট৷ ‘কা’ আন্দোলনত পাঁচ শ্বহীদৰ ত্যাগৰ কথা তেওঁলোকে পাহৰিলে৷ অখিল গগৈৰ মুক্তি আৰু ‘কা’ৰ বিৰোধিতাৰ পৰাও তেওঁলোক ফালৰি কাটি আহিছে৷ কেৱল শাসনৰ গাদীত বহাটোৱেই তেওঁলোকৰ লক্ষ্য হৈ পৰিছে৷ অখিল গগৈৰ সোঁৱে–বাঁৱে থকা নেতাসকলে এতিয়া কেৱল ক্ষমতাৰ খঁকত কাম কৰি আছে৷’ ইফালে মৰিয়নিৰ পৰা অখিল গগৈয়ে প্রার্থিত্ব প্রত্যাহাৰ কৰা কার্যতো ক্ষোভ প্রকাশ কৰিছে বৃহত্তৰ অসমীয়া যুৱ মঞ্চই৷ ইয়াৰ আঁৰত ৰহস্য লুকাই আছে বুলি উল্লেখ কৰি গগৈয়ে কয়– ‘কিহৰ বাবে অখিল গগৈয়ে মৰিয়নিৰ পৰা প্রার্থিত্ব প্রত্যাহাৰ কৰিলে৷ মৰিয়নিত ইয়াৰ বাবে ৰূপজ্যোতি কুর্মীৰ বিজয় মসৃণ হ’ল৷ দলৰ মজিয়াত কোনো আলোচনা নকৰাকৈয়ে মৰিয়নিৰ পৰা তেওঁ প্রার্থিত্ব প্রত্যাহাৰ কৰিলে৷’ তেওঁলোকে অখিল গগৈৰ মুক্তি আৰু ‘কা’ৰ বিৰুদ্ধে আন্দোলন অব্যাহত ৰাখিব বুলি উল্লেখ কৰি বিবেক ভোট প্রদান কৰিবলৈ ৰাইজক আহ্বান জনায়৷ কোনো ৰাষ্ট্রীয় আৰু আঞ্চলিক দলক সমর্থক জনোৱা নাই বুলি স্পষ্ট কৰি দি গগৈয়ে কয় যে অগপ বর্তমান ৰাষ্ট্রীয় দলৰ নেগুৰত ধৰি ঘূৰি ফুৰিছে৷ আঞ্চলিকতাবাদী চিন্তা ৰাইজৰ দলৰো এসময়ত যে নাইকিয়া হৈ যাব, সেয়া নুই কৰিব নোৱাৰি৷ সংবাদ মেলত কেন্দ্রীয় কার্যনির্বাহক সদস্য যাদৱ গগৈয়ে কয় যে ৰাইজৰ দল আৰু অসম জাতীয় পৰিষদৰ মাজত মতানৈক্য সৃষ্টি হৈছে৷ যাৰ বাবে এই দলসমূহৰ ভাবমূর্তি বিনষ্ট হৈছে৷