নিয়মীয়া বাৰ্তা, ২০ মাৰ্চঃ কংগ্রেছ নেত্রী প্রিয়ংকা গান্ধীয়ে অহা ২২ মার্চত নগাঁও জিলাৰ বটদ্রৱা বিধানসভা সমষ্টিত মহাজোঁটৰ প্রার্থী শিৱামণি বৰাৰ হৈ প্রচাৰ চলাব৷ বটদ্রৱা সমষ্টিৰ অন্তর্গত বাটমাৰীত এখন বিশাল নির্বাচনী সভাত প্রিয়ংকা গান্ধীয়ে অংশগ্রহণ কৰিব৷
প্রথমে নেত্রীগৰাকীয়ে গুৰুজনাৰ জন্মস্থান বটদ্রৱা থানত আশিস গ্রহণ কৰি বিয়লি ২ বজাত অনুষ্ঠিত হ’ব লগা নির্বাচনী সভাত অংশ ল’ব৷ ইতিমধ্যে এই সভাখন সফল কৰি তুলিবলৈ কংগ্রেছে ব্যাপক তৎপৰতা আৰম্ভ কৰিছে৷
আনহাতে, আজি ৰূপহীহাট আৰু লাহৰীঘাট সমষ্টিত বিজেপিৰ হৈ প্রচাৰ চলাবলৈ আহিব বিজেপিৰ কেন্দ্রীয় সংখ্যালঘু মর্চাৰ সভাপতি জামাল ছিদ্দিকী৷ সংখ্যালঘু অধ্যুষিত সমষ্টি দুটাত সংখ্যালঘু ভোটাৰক আকর্ষিত কৰিবৰ বাবে বিজেপিৰ সংখ্যালঘু নেতাগৰাকীয়ে দুদিনীয়াকৈ প্রচাৰ কার্যসূচীত অংশগ্রহণ কৰিব৷