নিয়মীয়া বাৰ্তা, ২৩ মাৰ্চঃ মহানগৰীৰ সাতমাইলত কালি নিশা এক ভয়ংকৰ পথ দুর্ঘটনা সংঘটিত হয়৷ এই পথ দুর্ঘটনাত দুজন লোক গুৰুতৰভাৱে আহত হয়৷ আৰক্ষী সূত্রই জানিবলৈ দিয়া মতে লংকেশ্বৰৰ পৰা জালুকবাৰী অভিমুখী এ এছ–২৫–ই চি–৩২৪৫ নম্বৰৰ বালিভর্তি ট্রাকখনে পথৰ দাঁতিত ৰখাই থোৱা জে এইচ–১৬–এফ–২১৯৬ নম্বৰৰ ট্রাকত খুন্দা মাৰে৷
ফলত ট্রাকখনৰ লগতে বালিভর্তি ট্রাকখনৰ বিস্তৰ ক্ষতি হোৱাৰ উপৰি বালিভর্তি ট্রাকৰ চালক–হেণ্ডিমেন ক্রমে তাইজুদ্দিন আলী আৰু ৰহিম আলী গুৰুতৰভাৱে আহত হয়৷ দুয়োকে পিছত হাস্পতালত ভর্তি কৰোৱা হয়৷
ইপিনে, এই দুর্ঘটনাক কেন্দ্র কৰি নিশা ৩৭নং ৰাষ্ট্রীয় ঘাইপথত তীব্র যান–জঁটৰ সৃষ্টি হয়৷ অৱশ্যে আৰক্ষীৰ তৎপৰতাত পৰৱর্তী সময়ত যান–জঁট নিয়ন্ত্রণলৈ আহে৷