নিয়মীয়া বাৰ্তা, ২৭ মার্চঃ উদীয়মান বেটছমেন ডেভন কনৱে আৰু ডাৰিল মিচেলৰ চমকপ্রদ শতকৰ সহায়ত নিউজিলেণ্ডে এদিনীয়া শৃংখলাত বাংলাদেশক ক্লীন শ্বুইপ কৰিবলৈ সক্ষম হৈছে৷ ৱেলিংটনত অনুষ্ঠিত শৃংখলাৰ তৃতীয় তথা অন্তিম এদিনীয়াত ঘৰুৱা দলটোৱে বাংলাদেশক ১৬৪ ৰানৰ বৃহৎ ব্যৱধানত পৰাস্ত কৰি ৩–০ৰ ব্যৱধানত শৃংখলাটো দখল কৰে৷
প্রথমে বেটিং কৰি নিউজিলেণ্ডে নির্ধাৰিত ৫০ অভাৰত ৬ উইকেটৰ বিনিময়ত ৩১৮ ৰানৰ বৃহৎ স্ক’ৰ থিয় কৰায়৷ দলটোৰ হৈ কনৱেই ১১০টা বলত ১৭টা বাউণ্ডেৰীৰ সহায়ত ১২৬ ৰানৰ অনবদ্য অৰিহণা আগবঢ়ায়৷
মিচেলে ৯২ বলত ৯টা বাউণ্ডেৰী আৰু দুটা অভাৰ বাউণ্ডেৰীৰ সহায়ত ১০০ ৰান সংগ্রহ কৰি অপৰাজিত হৈ ৰয়৷ তাৰকা অ’পেনাৰ মার্টিন গুপ্ঢিল ২৬ আৰু হেনৰী নিকলছ ১৮ ৰানত আউট হয়৷ প্রত্যুত্তৰত বাংলাদেশে ৪২.৪ অভাৰত মাত্র ১৫৪ ৰানতে আটাইকেইটা উইকেট হেৰুৱায়৷