নিয়মীয়া বাৰ্তা, ২৭ এপ্রিলঃ মঙলৰ বুকুত আমেৰিকান মহাকাশ গৱেষণা সংস্থা নাছাৰ ৰ’ভাৰ পাৰছিভাৰেন্সে বিভিন্ন পৰীক্ষা–নিৰীক্ষা চলাই থকাৰ সময়তে এতিয়া ইঞ্জিনিউটী হেলিকপ্টাৰে ৰঙা গ্রহটোত উৰণেৰে গঢ়িছে অভিলেখ৷
তৃতীয়টো সফল উৰণ ড্রোন হেলিকপ্টাৰ ইঞ্জিনিউটিয়ে কালি সফলতাৰে সম্পন্ন কৰিছে মঙলৰ আকাশত৷ প্রায় ৮০ ছেকেণ্ড সময়ত ইঞ্জিনিউটিয়ে ৫ মিটাৰ উচ্চতাৰে ৫০ মিটাৰ দূৰত্ব অতিক্রম কৰে এই তৃতীয়টো উৰণত৷
ইয়াৰ পাছতে যাত্রাস্থলীলৈ পুনৰ উভতি আহে ক্ষুদ্র হেলিকপ্টাৰখন। ইতিমধ্যে ইয়াৰ আলোকচিত্র তথা ভিডিঅ’ পাৰছিভাৰেন্স ৰ’ভাৰে পৃথিৱীলৈ প্রেৰণ কৰিছে৷ লগে লগে মহাকাশ গৱেষণা সংস্থা নাছাই এই ভিডিঅ’ আৰু ছবি মুকলি কৰি দিছে৷
লক্ষণীয়ভাৱে মংগলৰ আকাশত হেলিকপ্টাৰ উৰুওৱা ঘটনাক ঐতিহাসিক আখ্যা দিছে নাছাই৷ কোনোদিনে মহাকাশ গৱেষণা সংস্থাটোৱে মঙলৰ আকাশত এনেদৰে হেলিকপ্টাৰ উৰুওৱাটো সম্ভৱ হ’ব বুলি কল্পনা কৰা নাছিল৷