নিয়মীয়া বাৰ্তা, ১৬ মে’: অ’ এন জি চিৰ অপহূত কর্মচাৰী ৰিতুল শইকীয়া ম্যানমাৰত সুস্থ শৰীৰে সুকলমে আছে৷ শনিবাৰে বহুপ্রত্যাশিত এই আশাৰ খবৰ দিলে মুখ্যমন্ত্রী ড০ হিমন্ত বিশ্ব শর্মাই৷
ডিব্রুগড়–তিনিচুকীয়া জিলা ভ্রমণলৈ অহা মুখ্যমন্ত্রী ড০ শর্মাই সংবাদ মাধ্যমৰ আগত কয় যে ৰিতুল শইকীয়া বর্তমান ম্যানমাৰত আছে৷ তেওঁ আজিৰ তাৰিখত ভাল স্বাস্থ্যৰে সুৰক্ষিত হৈ আছে৷ শইকীয়াৰ মুক্তিৰ বাবে বিভিন্ন পর্যায়ত কথা–বতৰা চলি থকা বুলি উল্লেখ কৰি মুখ্যমন্ত্রী ড০ শর্মাই কয়– পৰহি মই মাজুলীলৈ আহোঁতে শইকীয়াৰ বুঢ়ী মাক আৰু কোলাত কেঁচুৱালৈ অহা পত্নীক লগ পাইছিলোঁ৷ সেই দৃশ্য অতিকে মর্মান্তিক৷ বুঢ়ী মাক আৰু কোলাত থকা শিশুটিৰ মুখলৈ চাই শইকীয়াক অচিৰেই মুকলি কৰি দিবলৈ মুখ্যমন্ত্রী ড০ শর্মাই আহ্বান জনায়৷