নিয়মীয়া বাৰ্তা ১৫ জুনঃ বিশ্বৰ বিভিন্ন দেশলৈ ক’ভিড–১৯ প্রতিৰোধী ভেকচিন স্পুটনিক–ভি প্রেৰণ কৰাৰ পাছত এইবাৰ ৰাছিয়াই ৮ৰ পৰা ১২ বছৰীয়া শিশুৰ ওপৰত ভেকচিনৰ পৰীক্ষা চলাইছে৷ দেশখনৰ গামালেয়া ইনষ্টিটিউটৰ তৰফৰ পৰা শিশুৰ ওপৰত ক’ভিড ভেকচিনৰ ক্লিনিকেল টেষ্ট চলোৱা বুলি প্রতিষ্ঠানটোৰ মুৰব্বী আলেকজেণ্ডাৰ গিণ্টছবার্গে সংবাদ মাধ্যমক জনাইছে৷ পৰীক্ষাৰ সময়ত শিশুসকলৰ কোনো ধৰণৰ পার্শ্বক্রিয়া হোৱা নাই বুলি সদৰীও কৰিছে গিণ্টছবার্গে৷
উল্লেখনীয় যে নজেল স্প্রে হিচাপে এই ভেকচিনবিধৰ শিশুৰ দেহত পৰীক্ষা চলোৱা হৈছে৷ আগন্তুক ছেপ্টেম্বৰ মাহৰ ভিতৰত ৰাছিয়াই ৮ৰ পৰা ১২ বছৰীয়া শিশুৰ মাজত ক’ভিড ভেকচিন প্রদান কৰিবলৈ সক্ষম হ’ব বুলি গামালেয়া ইনষ্টিটিউটৰ মুৰব্বীগৰাকীয়ে সংবাদ মাধ্যমক জনাইছে৷ গামালেয়াৰ তৰফৰ পৰাই স্পুটনিক–ভি ভেকচিন প্রথম প্রস্তুত কৰা হৈছিল৷
স্মর্তব্য যে বিশ্বত গামালেয়াই প্রথমতে ক’ভিড প্রতিৰোধী ভেকচিন প্রস্তুত কৰিবলৈ সক্ষম হৈছিল৷ শিশুৰ বাবে এই ভেকচিনবিধ অৱশ্যে বেজী অবিহনে ব্যৱহাৰ কৰা হ’ব৷ শিশুসকলৰ নাকত স্প্রে হিচাপে এই ভেকচিনবিধ ছটিয়াই দিয়া হ’ব বুলি গিণ্টছবার্গে দেশখনৰ তাছ নিউজ এজেঞ্চীক জনাইছে৷ লক্ষণীয় যে শিশুৰ ওপৰত প্রথমখন দেশ হিচাপে ৰাছিয়াই ক’ভিড ভেকচিনৰ পৰীক্ষা চলাইছে৷