নিয়মীয়া বাৰ্তা ২৩ জুনঃ মহানগৰ আৰক্ষীয়ে আজি সন্ধিয়া আজাৰা থানাৰ অন্তর্গত ধাৰাপুৰ মজলীত অভিযান চলাই ২৬ লাখ টকা নগদ ধনসহ বহু নিচাযুক্ত টেবলেট জব্দ কৰে৷ মহানগৰ আৰক্ষীৰ যুটীয়া আয়ুক্ত পার্থসাৰথি মহন্ত আৰু এ ডি চি পি সঞ্জীৱ শইকীয়াই গোপন সূত্রে পোৱা খবৰৰ ভিত্তিত আজাৰা আৰক্ষীৰ সহযোগত ধাৰাপুৰ মজলীৰ ছফিকুল ইছলামৰ বাসগৃহত অভিযান চলায়৷ অভিযানত আৰক্ষীৰ দলটোৱে ছফিকুলৰ বাসগৃহৰ পৰা ডেৰ লাখworld is yours (ৱাই বা) নামৰ নিচাযুক্ত টেবলেট জব্দ কৰে৷ জব্দকৃত টেবলেটখিনিৰ বজাৰ মূল্য প্রায় ২.৫৫ কোটি টকা৷ অভিযানকাৰী দলটোৱে ছফিকুল ইছলামক আটক কৰাৰ লগতে বাসগৃহত তালাচী চলাই নগদ ২৬ লাখ টকা উদ্ধাৰ কৰে৷
উল্লেখ যে ধুবুৰীৰ ছফিকুল ইছলামে প্রায় এবছৰ পূর্বে মজলীত মাটি কিনি, ঘৰ নির্মাণ কৰি বসবাস কৰি আছিল৷ সাধাৰণ দৃষ্টিত কোনো কাম–কাজ নকৰা ছফিকুলে কটাই আহিছিল এক বিলাসী জীৱন৷ আজাৰাৰ বিভিন্ন ঠাইত নামে–বেনামে বহু মাটি আৰু সা–সম্পত্তি ক্রয় কৰা ছফিকুলৰ বাসগৃহৰ পৰা আৰক্ষীয়ে এ এছ–০১ ই টি–৭৯৯৮ নম্বৰৰ এখন বিলাসী বাহন জব্দ কৰাৰ লগতে বহু আপত্তিজনক সামগ্রী উদ্ধাৰ কৰে৷ আনহাতে আৰক্ষীয়ে ছফিকুলক আটক কৰি বাসগৃহত তালাচী চলাই থকাৰ সময়তে ছফিকুলে আৰক্ষীৰ চকুত ধূলি দি পলায়নৰ চেষ্টা চলায়৷
আৰক্ষীয়ে ছফিকুলক খেদি খেদি ধৰিব খোজাৰ সময়তে আৰক্ষীক আক্রমণ কৰে৷ পলায়ন কৰি বিচৰা ছফিকুলৰ ভৰিত লক্ষ্য কৰি আৰক্ষীয়ে গুলীচালনা কৰে৷ আৰক্ষীৰ গুলী ভৰিত লাগি গুৰুতৰভাৱে আহত হোৱা ছফিকুলক আৰক্ষীয়ে ততালিকে জি এম চি এইচত ভর্তি কৰায়৷ আৰক্ষী সূত্রে জানিব পৰা মতে, সহজলভ্য ধনৰ মোহ দেখুৱাই ছফিকুলে দাঁতিকাষৰীয়া এটা যুৱকৰ দলক ড্রাগ্ছৰ প্রতি আসক্ত কৰি তোলাৰ লগতে ড্রাগ্ছৰ বেহাতো জডিত কৰাইছিল৷ অৱশ্যে আৰক্ষীৰ তদন্তৰ পিছতহে সকলো তথ্য পোহৰলৈ অহাৰ সম্ভাৱনা আছে।