নিয়মীয়া বাৰ্তা ৩০ জুনঃ ৰাজ্যৰ অন্যান্য প্রান্ততো দূৰৰে কথা খোদ গুৱাহাটী মহানগৰীৰ মাজমজিয়াত অস্বাস্থ্যকৰ পৰিৱেশৰ মাজত জৰাজীর্ণ গৃহত চলিছে বহু চৰকাৰী কার্যালয়৷ ইয়াৰ অন্যতম উদাহৰণ হ’ল উলুবাৰীৰ ৰামকৃষ্ণ মিছন ৰোডত থকা কামৰূপ জিলা কৃষি বিভাগৰ কার্যালয়৷ এই কার্যালয়টোৰ পৰাই কামৰূপ মহানগৰ আৰু কামৰূপ (গ্রাম্য) দুয়োখন জিলাৰ কৃষি বিভাগৰ কাম–কাজ নিয়ন্ত্রণ হয়৷ কামৰূপ জিলা কৃষি বিভাগৰ কার্যালয়টোত অস্বাস্থ্যকৰ পৰিৱেশৰ মাজত বছৰৰ পাছত বছৰ ধৰি কর্মচাৰীসকলে কাম–কাজ কৰি আহিছে৷
কার্যালয়টোত কর্মচাৰীসকলে ভয় আৰু শংকাৰে কর্তব্য সম্পাদন কৰি আহিবলগীয়া হৈছে৷ কার্যালয়টোৰ ওপৰ মহলাৰ ছাদ জহি–খহি যোৱাৰ লগতে ছাদ খহি পৰিছে৷ বাৰিষাৰ সময়ছোৱাত বৰষুণ হ’লেই চাদৰ পানী টেবুলৰ ওপৰত পৰে৷ কামৰূপ জিলা কৃষি বিষয়াৰ কার্যালয়টো জৰাজীর্ণ হৈ পৰাত যিকোনো মুহূর্ততে ছাদ খহি ভয়াৱহ দুর্ঘটনা সংঘটিত হোৱাৰ আশংকা কৰিছে কর্মচাৰীসকলে৷ বছৰৰ পাছতে বছৰ ধৰি জৰাজীর্ণ গৃহত কর্মচাৰীসকলে কাম কৰি অহাৰ পাছতো বিভাগীয় কর্তৃপক্ষই কার্যালয়টো মেৰামতি কৰাৰ বাবে কোনো ব্যৱস্থা গ্রহণ নকৰাটো আশ্চর্যজনক৷