নিয়মীয়া বাৰ্তা, ১৬ জুলাইঃ ভাৰতৰ ভৌগোলিক অখণ্ডতা আৰু সার্বভৌমত্বক প্রত্যাহ্বান জনাই থকা চীনে এল এ চিৰ সমীপত নিজৰ স্থিতি শক্তিশালীকৰণ অব্যাহত ৰাখিছে৷ উত্তৰ–পূর্বাঞ্চলৰ ৰাজ্য অৰুণাচল প্রদেশৰ সীমান্তলৈকে দ্রুতবেগী বুলেট ট্রেইন চলাই ভাৰতৰ প্রতি প্রত্যাহ্বান নমাই অনা চীনে এইবাৰ এল এ চিৰ সমীপতে নির্মাণ কৰিছে স্থায়ী কংক্রিটৰ শিবিৰ৷ এই স্থায়ী কংক্রিটৰ শিবিৰৰ পৰা যাতে চীনৰ সেনাই এল এ চিৰ বিবদমান অঞ্চলত প্রৱেশ কৰিব পাৰে, তাৰ পৰিকল্পনা আগবঢ়াই নিছে বেইজিঙে৷ উত্তৰ–পূর্বাঞ্চলৰ ছিকিমৰ নাকুলা আৰু ইষ্টার্ন লাডাখৰ এল এ চিৰ সমীপতে চীনৰ স্থায়ী কংক্রিটৰ শিবিৰক লৈ উদ্বিগ্ন হৈছে নতুন দিল্লী৷
চৰকাৰৰ শীর্ষ বিষয়াৰ সূত্রত প্রকাশ পোৱা মতে, ছিকিমৰ দক্ষিণ প্রান্তৰ নাকুলা অঞ্চলৰ বিপৰীতে চীনৰ ভূমিত নির্মিত স্থায়ী কংক্রিটৰ শিবিৰটো এল এ চিৰ পৰা মাত্র কেইমিনিটমানৰ বাট৷ এই স্থায়ী শিবিৰ নির্মাণ কৰা হৈছে বিগত বর্ষৰ লগতে চলিত বর্ষৰ জানুৱাৰী মাহত ভাৰতীয় আৰু চীনা সেনাৰ মাজত সংঘাত হোৱা স্থানৰ পৰা কেইমিনিটমানৰ দূৰত্বত৷ সূত্রটোৰ মতে, এল এ চিৰ সমীপত সেনা মোতায়েন কৰাৰ লক্ষ্যৰে চীনে স্থায়ী কংক্রিটৰ শিবিৰ নির্মাণ কৰিছে৷ অঞ্চলটোত ৰাস্তা অতি ভাল আৰু এই ৰাস্তাৰে পূর্বতকৈ অধিক সহজতে ভাৰতৰ সৈতে থকা সীমান্তলৈ আহযাহ কৰিব পাৰিব৷
আনপিনে ইষ্টার্ন লাডাখ আৰু অৰুণাচল অঞ্চলতো আধুনিক অট্টালিকা নির্মাণ কৰি উলিয়াইছে৷ অগ্রিম স্থানত কর্তব্যৰত সেনাই শীতৰ সময়ত অসুবিধাৰ সন্মুখীন হ’লে এই অট্টালিকাৰ সহায় ল’ব পাৰিব৷ শীতৰ সময়ত এই অঞ্চলত মোতায়েন হৈ থকা চীনৰ সেনাই কর্তব্য পালনত প্রচণ্ড অসুবিধাৰ সন্মুখীন হৈ আহিছে৷ পৰিণতিত শীতৰ সময়ত তাৰ পৰা ৯০ শতাংশ সেনাক সালসলনি কৰিবলৈ বাধ্য হৈ পৰে৷ গুৰুত্বপূর্ণ যে উক্ত অঞ্চলত চীনৰ সেনাই দীর্ঘদিন ধৰি বাহৰ পাতি থকাৰ বাবেই স্থায়ী কংক্রিটৰ আন্তঃগাঁথনি নির্মাণ কৰি উলিয়াইছে আৰু ভাৰতৰ গতিবিধি নিৰীক্ষণ কৰি থাকিব৷
আনপিনে পাংগং হ্রদ অঞ্চলৰ পৰা আঁতৰাই নিবলৈ বাধ্য হোৱা চীনে সেনা জোৱানসকলক তিব্বতৰ ৰুটগ চহৰৰ সমীপতে ৰাখিছে আৰু তাতেও আন্তঃগাঁথনি নির্মাণ কৰিছে৷ উল্লেখ্য যে বিগত বর্ষত লাডাখৰ গালৱান উপত্যকাত চীনা আৰু ভাৰতীয় সেনাৰ মাজত হোৱা ভয়ানক সংঘর্ষৰ পিছত আজিলৈকে এল এ চিৰ উত্তেজনা সম্পূর্ণ হ্রাস পোৱা নাই৷ দুয়ো দেশৰ সেনাৰ কমাণ্ডাৰ পর্যায়ৰ বৈঠক কেইবাবাৰো অনুষ্ঠিত হোৱাৰ লগতে কূটনৈতিক পর্যায়ৰ আলোচনা হৈছে৷ বিবদমান সীমা সমস্যা সমাধানৰ বাবে দুয়ো দেশৰ মাজত আলোচনা চলে যদিও কার্যতঃ এতিয়াও সুমীমাংসা হোৱা নাই৷