নিয়মীয়া বাৰ্তা, ১৬ জুলাইঃ যি সময়ত চৰকাৰে অসমত আদর্শ গাঁও নির্মাণৰ সংকল্প লৈছে, ঠিক সেই সময়তে পোহৰলৈ আহিছে এখন আদিম যুগৰ লেখীয়া গাঁৱৰ জীয়া ছবি৷ জকাইচুকত নহয়, গুৱাহাটী মহানগৰীৰ পৰা প্রায় ১৫ কিলোমিটাৰ নিলগত আছে এইখন গাঁও৷
যিখন গাঁৱৰ জীয়া ছবি পোহৰলৈ আহিছে ‘নিয়মীয়া বার্তা’ৰ গ্রাউণ্ড জিৰ’ ৰিপ’টত৷ স্বাধীনতাৰ পূর্বে স্থাপন হোৱা এইখন গাঁৱত আজিলৈকে নহ’ল কোনো উন্নয়নমূলক কাম৷ নহ’ল বাট–পথৰ উন্নয়ন৷ ফলত পৌৰাণিক পদ্ধতিতে এতিয়াও এইখন গাঁৱত চলে চিকিৎসা সেৱা৷ প্রায় ৯০০ পৰিয়ালক সামৰি থকা এইখন গাঁৱত চিকিৎসালয় নথকাৰ বাবে এতিয়াও একাংশই জৰা–ফুঁকাৰ চিকিৎসাত বিশ্বাস কৰে৷
দৰং, কামৰূপ আৰু মৰিগাঁৱৰ সীমান্তৱর্তী চনকা গাঁৱত নাই বিজুলীৰ ব্যৱস্থা৷ তদুপৰি পাহাৰৰ কাষত অৱস্থিত এইখন গাঁৱত ভালদৰে নপৰে সূর্যৰ পোহৰ৷ অর্থাৎ পুৱা ১০ বজাৰ পাছতহে এইখন গাঁৱত উদয় হয় সূর্য৷ তাতোতকৈ ডাঙৰ কথা এইখন গাঁৱৰ পৰা আজিলৈ উত্তীর্ণ হোৱা নাই এজনো স্নাতক৷ অর্থাৎ এই চনকা গাঁৱৰ পৰা বি এ পাছ কৰা যুৱক নাই গাঁওখনত৷ তদুপৰি এইখন গাঁৱৰ পৰা মেট্ৰিক আৰু উচ্চতৰ মাধ্যমিকত উত্তীর্ণৰ সংখ্যাও আঙুলিৰ মূৰত লেখিব পৰা৷ ইয়াৰ মূলতে হ’ল শিক্ষা পদ্ধতি৷ এতিয়ালৈকে এই বৃহত্তৰ গাঁওখনত নাই এখনো উচ্চতৰ মাধ্যমিক বিদ্যালয়৷ আছে এখন প্রাথমিক বিদ্যালয় আৰু আছে এখন মাধ্যমিক বিদ্যালয়৷ যাৰ বাবে এইখন গাঁৱত উচ্চ শিক্ষাৰ পৰা বঞ্চিত হৈ আছে বহু ছাত্র–ছাত্রী৷
বিজ্ঞান আৰু প্রযুক্তিবিদ্যাৰ জয়জয়কাৰ অৱস্থাত চনকা গাঁৱৰ ৰাইজে আজিলৈ দেখা নাই বিদ্যুতৰ পোহৰ৷ ইণ্টাৰনেট, ফেচবুক এই অঞ্চলবাসীৰ বাবে সুদুৰপৰাহত৷ চৰকাৰী আঁচনিয়ে ঢুকি নোপোৱা গাঁওখনৰ প্রায় ৯০০ পৰিয়ালৰ ৰাইজ জডিত কৃষিকর্মৰ লগতহে৷ জাগীৰোড সমষ্টিৰ অন্তর্গত এই গাঁওখনত এতিয়াও বিধ্বস্ত হৈ আছে বাট–পথ, নাই খোৱাপানীৰ ব্যৱস্থা৷ নৈৰ পানীৰে তৃষ্ণা দূৰ কৰে গাঁওখনৰ ৰাইজে৷ যাৰ বাবে বিভিন্ন সময়ত বিভিন্ন ৰোগত আক্রান্ত হৈছে বহু লোক৷ এক অর্থাৎ বিধ্বস্ত ৰূপ আৰু পৌৰাণিক পদ্ধতিৰে চলিছে চনকা গাঁৱৰ ৰাইজ৷ সেইহে গাঁওখনৰ উন্নয়নৰ বাবে নতুন চৰকাৰ তথা মুখ্যমন্ত্রী ড০ হিমন্ত বিশ্ব শর্মাৰ হস্তক্ষেপ দাবী কৰিছে স্থানীয় অঞ্চলবাসী ৰাইজে৷