নিয়মীয়া বাৰ্তা ৩১ জুলাইঃ কামৰূপ মহানগৰ জিলাৰ অন্তর্গত ৭খন পানী যোগান আঁচনিৰ অধীনত সম্পূর্ণ হোৱা ১,০১৭টা গৃহ–সংযোগ কাইলৈ ১০.৩০ বজাত আনুষ্ঠানিকভাৱে হিতাধিকাৰীসকলক হস্তান্তৰ কৰা হ’ব৷ পশ্চিম গুৱাহাটী, কাঁহিকুছি গাঁও পঞ্চায়তৰ কুঁৱৰীগাঁও পানী যোগান আঁচনি আৰু আমচিং গাঁও পঞ্চায়তৰ অধীনৰ ঝর্ণাবস্তি পানী যোগান আঁচনিৰ প্রাংগণত এই উদ্দেশ্যে অনুষ্ঠিত সভাত সংশ্লিষ্ট বিধায়কসকলে হিতাধিকাৰীসকলক আনুষ্ঠানিকভাৱে হস্তান্তৰ কৰিব৷
উল্লেখ্য যে সমগ্র ৰাজ্যখনতে জলজীৱন মিছনৰ অধীনত ২০২১–২২ বিত্তীয় বর্ষত ইতিমধ্যে ২.৮৮ লাখ লোকক খোৱাপানীৰ গৃহ–সংযোগ দিয়া হৈছে৷ ইয়াৰ ভিতৰত অকল জুলাই মাহতে ১ লাখৰো অধিক গৃহ–সংযোগ দিয়া হৈছে৷ আনহাতে, অধিক লোকক পানী যোগান ধৰাৰ বাবে গৃহ–সংযোগৰ কাম চলি আছে৷