নিয়মীয়া বাৰ্তা ১৪ আগষ্টঃ ৰাজ্যৰ ৰাষ্ট্রীয় ঘাইপথসমূহত শেহতীয়াকৈ ইণ্টাৰচেপ্টৰ ব্যৱহাৰেৰে নির্ধাৰিত গতিবেগৰ নিয়ম ভংগ কৰা চালকলৈ ই–চালান প্রেৰণ কৰা প্রক্রিয়াই সৃষ্টি কৰিছে তীব্র প্রতিক্রিয়া৷
পৰিবহণ বিভাগে সজাগতা সৃষ্টি নকৰাকৈয়ে ৰাজ্যত ই–চালান প্রদান কৰাক লৈ একাংশ চালকৰ মাজত হাহাকাৰ সৃষ্টি হোৱাৰ পাছত শুকুৰবাৰে প্রতিক্রিয়া প্রকাশ কৰিছে বিভাগীয় মন্ত্রী চন্দ্রমোহন পাটোৱাৰীয়ে৷
অসম বিধানসভা অধিৱেশনত অংশগ্রহণৰ পাছত সংবাদ মাধ্যমৰ আগত তেওঁ কয় যে ২০২০–২১ বর্ষত ৰাজ্যত ৭ হাজাৰ দুর্ঘটনা সংঘটিত হৈছে৷ এই দুর্ঘটনাসমূহত প্রায় তিনি হাজাৰ লোকৰ মৃত্যু ঘটিছে৷ ক’ভিডৰ সংক্রমণৰ বাবে সান্ধ্য আইন–লকডাউন আদি ঘোষণা কৰাৰ পাছতো ৰাজ্যত দুর্ঘটনাৰ সংখ্যাই ৭ হাজাৰৰ ঘৰ অতিক্রম কৰিছে৷ এই দুর্ঘটনাসমূহৰ পর্যালোচনাৰ অন্তত পোহৰলৈ অহা তথ্য অনুসৰি বিগত বর্ষত সংঘটিত দুর্ঘটনাৰ ৭৫ শতাংশৰে অত্যধিক গতিবেগেই কাৰণ৷
সেয়েহে এই ব্যৱস্থা গ্রহণ কৰা হৈছে বুলি মন্তব্য কৰি তেওঁ কয়– ‘ৰাষ্ট্রীয় ঘাইপথসমূহত ৰাষ্ট্রীয় ঘাইপথ প্রাধিকৰণ আৰু ৰাজ্যিক পথসমূহত লোকনির্মাণ বিভাগে গতিবেগ নির্ধাৰণ কৰি দিয়ে৷ ২০২০ চনত যান–বাহন আইন সংশোধন কৰা হৈছে৷ এই সংশোধন অনুসৰি অত্যধিক গতিবেগৰ বাবে পূর্বে ৪০০ টকাৰ ঠাইত জৰিমনা ২,০০০ টকালৈ বৃদ্ধি কৰা হৈছে৷ ভাৰতবর্ষৰ প্রায় আটাইবোৰ ৰাজ্যত অত্যধিক গতিবেগৰ বাবে জৰিমনা লোৱাৰ ব্যৱস্থা আছে৷ আমি ইণ্টাৰচেপ্টৰৰ জৰিয়তে ৰাজ্যত নির্ধাৰিত গতিবেগৰ নিয়ম ভংগ কৰাসকলক ই–চালানৰ জৰিয়তে জৰিমনা প্রদান কৰা হৈছে৷’