নিয়মীয়া বাৰ্তা ১৪ আগষ্টঃ বিশ্ব জনহিতৈষী কাম–কাজেৰে বিখ্যাত হোৱা ১০০ ভাৰতীয় কর্প’ৰেট নেতাৰ তালিকাত স্থান লাভ কৰিছে বাণিজ্যিক টাইকুন গৌতম আদানি, নীতা আম্বানি আৰু কুমাৰ মংগলম বিৰলাই৷ আমেৰিকাত থকা ভাৰতীয় লোকৰ এক সংস্থা ‘ইণ্ডিয়াছপোৰা’ৰ তৰফৰ পৰা কালি মুকলি কৰা হৈছে এই তালিকাখন৷ এই তালিকাখনত আদানি, আম্বানি আৰু বিৰলাৰ উপৰি স্থান লাভ কৰিছে মণ্টে আহুজা, অজয় বাংগা, মনোজ ভার্গৱেও৷ এই তিনিগৰাকীৰ বসতিস্থল হৈছে আমেৰিকা৷ ইয়াৰ উপৰি ব্রিটেইনত থকা ভাৰতীয় মূলৰ মহম্মদ আমেৰশ্বি, মনোজ বাদালে আৰু কুজিন্দৰ বাহিয়ায়ো এই তালিকাত স্থান লাভ কৰিছে৷