নিয়মীয়া বাৰ্তা, ৯ জানুৱাৰীঃ গুৱাহাটীত অনুষ্ঠিত হ’ব লগীয়া ৬৫ সংখ্যক ফিল্ম ফেয়াৰ বঁটা প্ৰদান অনুষ্ঠান হোষ্ট কৰিব বলীউদৰ বাদশ্বাহ শ্বাহৰুখ খানে। ৰাষ্ট্ৰীয় সংবাদ মাধ্যমত প্ৰকাশিত বাতৰি অনুসৰি শ্বাহৰুখে বলীউদৰ আন এগৰাকী জনপ্ৰিয় অভিনেতা বিকি কৌশলৰ সৈতে ফিল্মফেয়াৰত হোষ্ট কৰিব। সকলো ঠিকে থাকিলে অহা ১৫ ফেব্ৰুৱাৰীত কিং খানৰ যাদু ফিল্ম ফেয়াৰৰ মঞ্চত স্বচক্ষে প্ৰত্যক্ষ কৰিবলৈ সুযোগ লাভ কৰিব ৰাজ্যবাসীয়ে। উল্লেখ্য যে প্ৰথমবাৰৰ বাবে মুম্বাইৰ বাহিৰত টাইমছ গ্ৰুপে ফিল্ম ফেয়াৰ বঁটা প্ৰদান অনুষ্ঠিত কৰিবলৈ সিদ্ধান্ত গ্ৰহণ কৰিছে। গুৱাহাটীত ১৫ ফেব্ৰুৱাৰীত অনুষ্ঠিত হ’ব লগীয়া এই অনুষ্ঠানৰ বাবে ৰাজ্য চৰকাৰ আৰু টাইমছ গ্ৰুপৰ মাজত সম্পন্ন হৈছে বুজাবুজি চুক্তি। আমিনগাঁৱৰ ৰাজীৱ গান্ধী ইনড’ৰ ষ্টেডিয়ামত অনুষ্ঠিত হ’বলগীয়া জাক-জমকীয়া এই অনুষ্ঠানৰ বাবে ইতিমধ্যে ৰাজ্য চৰকাৰে প্ৰস্তুতি আৰম্ভ কৰিছে। বলীউদৰ জনপ্ৰিয় প্ৰায়সংখ্যক তাৰকাই ফিল্ম ফেয়াৰ বঁটা প্ৰদান অনুষ্ঠানৰ বাবে গুৱাহাটীত উপস্থিত হোৱাৰ সম্ভাৱনা আছে। অৱশ্যে এই অনুষ্ঠান উপভোগ কৰাৰ বাবে কেতিয়াৰ পৰা দৰ্শকে টিকট লাভ কৰিব সেয়া এতিয়াও স্পষ্ট কৰা হোৱা নাই। বিগত বৰ্ষত মুম্ৱাইত জিঅ’ গাৰ্ডেন বি কে চিত অনুষ্ঠিত ফিল্ম ফেয়াৰৰ টিকটৰ মূল্য আছিল ১০ হাজাৰ টকাৰ পৰা ৩লাখ টকা পৰ্যন্ত।