ছয়গাঁৱৰ চৌধুৰীপামত মবাইল টাৱাৰৰ তিনিটা চুৰি বেটাৰীৰ লগতে ২৫ কিলো বৈদ্যুতিক তাঁৰ জব্দ এজনক আটক

নিয়মীয়া বাৰ্তা, ৭ অক্টোবৰ : অপৰাধমূলক কাৰ্যকলাপৰ বিৰুদ্ধে ধাৰাবাহিক অভিযান অব্যাহত আছে ছয়গাঁও আৰক্ষীৰ। আজি পুৱতিনিশা ছয়গাঁও আৰক্ষীয়ে চলোৱা এক অভিযানত চৌধুৰীপামৰ এটা ডেম্পৰ পৰা মবাইল টাৱাৰৰ তিনিটা চুৰি বেটাৰী জব্দ কৰাৰ লগতে ২৫ কেজি এল টি বৈদ্যুতিক তাঁৰ জব্দ কৰে আনহাতে ডেম্পটোৰ গৰাকী তথা ইব্ৰাহীম আলীৰ পুত্ৰ নুৰ ইছলামক গ্ৰেপ্তাৰ কৰে ৷

জানিবপৰামতে চৌধুৰীপামৰ উক্ত ডেম্পটোত পুৰণি ভঙা চিঙা লোহা লক্কৰ মজুত কৰাৰ লগতে চুৰি কৰা বৈদ্যুতিক তাঁৰ,মবাইল টাৱাৰৰ বেটাৰীৰ লগতে আন চোৰাং সামগ্ৰীও মজুত কৰে। যোৱা নিশা এনে ব্যৱহৃত চোৰাং সামগ্ৰী ডেম্পটোলৈ আহিব বুলি ছয়গাঁও আৰক্ষীয়ে এক গোপন সুত্ৰৰ পৰা খবৰ লাভ কৰে। এই খবৰ পোৱাৰ পিচতেই ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া কপিল পাঠকৰ নেতৃত্বত চলোৱা অভিযানত উক্ত মূল্যৱান চোৰাং সামগ্ৰীখিনি জব্দ কৰাৰ লগতে নুৰ ইছলাম নামৰ লোকজনক গ্ৰেপ্তাৰ কৰে। অভিযোগমতে দীৰ্ঘদিন ধৰি উক্ত লোকজনে বিভিন্ন কামত ব্যৱহৃত হৈ থকা চোৰাং সামগ্ৰী ক্ৰয় কৰি এক ৰমৰমীয়া ব্যৱসায় চলাই আহিছে।