নিয়মীয়া বাৰ্তা ১৮ অক্টোবৰঃ গুৱাহাটীৰ বিশেষভাৱে সক্ষম যুৱতী প্রিন্সি গগৈক অপহৰণৰ যি অভিযোগ গহপুৰৰ এজন যুৱকৰ বিৰুদ্ধে উত্থাপন হৈছে, তাক অস্বীকাৰ কৰিছে গহপুৰৰ ঘাহিগাঁৱৰ যুৱক পৰাগ দাসে৷ গুৱাহাটীত ছাউণ্ড ইঞ্জিনীয়াৰিঙৰ পাঠ্যক্রম গ্রহণ কৰি থকা গহপুৰ ঘাহিগাঁও হুকাজানৰ যুৱক পৰাগ দাসৰ প্রিন্সি গগৈৰ লগত ৬ মাহ ধৰি প্রেমৰ সম্পর্ক আছিল বুলি তেওঁ জানিবলৈ দিছে৷
ফেচবুকত দুয়োৰে মাজত কথা–বতৰা গভীৰভাৱে চলি আছিল৷ তেওঁ যুৱতীগৰাকীক অপহৰণ কৰি অনা নাই বুলি কোৱাৰ লগতে যুৱতীগৰাকীৰ সম্পূর্ণ মতসাপেক্ষেহে ১৫ অক্টোবৰত নিজ গৃহলৈ আনিছিল বুলি জানিবলৈ দিয়ে৷ ১৬ অক্টোবৰত ঘাহিগাঁও আৰক্ষী চকীত ৰুজু কৰা গোচৰৰ পিছতে যুৱতীগৰাকীক পৰিয়ালৰ লোকে নিজ গৃহলৈ ওভতাই নিয়ে৷ কি কাৰণত প্রিন্সি গগৈয়ে তেওঁৰ বিৰুদ্ধে অপহৰণৰ গোচৰ তৰিলে, সেই বিষয়ে পৰাগ দাস জ্ঞাত নহয় বুলি ব্যক্ত কৰে৷ তেওঁলোকৰ প্রেমৰ সম্পর্কৰ কিছু প্রমাণো তেওঁৰ লগত আছে বুলি পৰাগ দাসে কয়৷