নিয়মীয়া বার্তা ১৭ জানুৱাৰীঃ মহানগৰীৰ ঐতিহাসিক পাণ্ডুনাথ দেৱালয়ত অহা ১ ফেব্রুৱাৰীত ৰাজ্য চৰকাৰৰ বিত্ত, স্বাস্থ্য আৰু গড়কাপ্ঢানী বিভাগৰ মন্ত্রী তথা স্থানীয় বিধায়ক ড০ হিমন্ত বিশ্ব শর্মাৰ ৫১ সংখ্যক জন্মদিন পালন কৰা হ’ব৷ পাণ্ডুনাথ দেৱালয় পৰিচালনা সমিতিৰ সম্পাদক নিমাই চন্দ্র দাসে জানিবলৈ দিয়া মতে, সেইদিনা সন্ধিয়া সমূহীয়া বন্তি প্রজ্বলনেৰে জন্মদিনৰ কার্যসূচীৰ শুভাৰম্ভ কৰাৰ পিছত নামপ্রসংগ, প্রার্থনা অনুষ্ঠিত হ’ব৷ আনহাতে জন্মদিনৰ লগত সংগতি ৰাখি ২৬ জানুৱাৰীত দিনৰ ভাগত পাণ্ডুনাথ দেৱালয়ত ছাত্র–ছাত্রীৰ মাজত তিনিটা শাখাত চিত্রাংকন প্রতিযোগিতা অনুষ্ঠিত হ’ব৷ ইয়াৰে ‘ক’ শাখাত প্রথমৰ পৰা পঞ্চম শ্রেণী, ‘খ’ শাখাত ষষ্ঠৰ পৰা অষ্টম শ্রেণী আৰু ‘গ’ শাখাত নৱমৰ পৰা দ্বাদশ শ্রেণীৰ ছাত্র–ছাত্রীসকলে অংশগ্রহণ কৰিব পাৰিব৷ বিজয়ী প্রতিযোগীসকলক ১ ফেব্রুৱাৰীৰ সন্ধিয়া পাণ্ডুনাথ দেৱালয়ত জন্মদিন উপলক্ষে আয়োজিত অনুষ্ঠানত বঁটা, মানপত্র আৰু নগদ ধন প্রদান কৰা হ’ব৷