নিয়মীয়া বাৰ্তা, ২৪ ডিচেম্বৰঃ দেশজুৰি এন আৰ চি নহ’লে ৰাজ্য চৰকাৰে উচ্চতম ন্যায়ালয়ত বৰ্তমানৰ এনআৰচিখনৰ সংশোধন বিচাৰিব ।- এই মন্তব্য ৰাজ্যৰ বিত্ত, স্বাস্থ্য আৰু গড়কাপ্টানী বিভাগৰ মন্ত্ৰী ড০ হিমন্ত বিশ্ব শৰ্মাৰ ।
সোমবাৰে জনতা ভৱনত অনুষ্ঠিত এক সংবাদমেলত মন্ত্ৰী ড০ শৰ্মাই কয় যে বৰ্তমানৰ এনআৰচিক লৈ ৰাজ্যচৰকাৰ সন্তুষ্ট নহয় । ৰাজ্যখনৰ অন্যান্য দল-সংগঠনৰ লগতে অসম চৰকাৰ এই এন আৰ চিক লৈ অসন্তুষ্ট ৷
এই এন আৰ চিখনত ভুল লিগেচীৰে বহুতেই নাম অন্তর্ভুক্ত কৰাৰ বাবে বর্তমানৰ ৰাজ্য চৰকাৰে সীমান্তৱর্তী জিলাসমূহত ২০ শতাংশ পুনৰীক্ষণ বিচাৰিছিল৷ এতিয়া যদি সমগ্র দেশতে এন আৰ চিৰ কাম আৰম্ভ হয়, অসম চৰকাৰে অসমতো এন আৰ চি বিচাৰিব৷ কিন্তু যদিহে দেশজুৰি এন আৰ চি নহয়, তেতিয়াহ’লে বর্তমানৰ এন আৰ চিখন সংশোধন–পুনৰীক্ষণ্ হোৱাটো বিচাৰিব৷ এন আৰ চি সম্পর্কত উচ্চতম ন্যায়ালয়ত হ’বলগীয়া শুনানিত অসম চৰকাৰে এই বিষয়ে অৱগত কৰিব৷
তেওঁ কয় যে উচ্চতম ন্যায়ালয়ৰ পূর্বৰ মুখ্য ন্যায়াধীশে বাংলাদেশ সীমান্তৱর্তী জিলাসমূহৰ খচৰা এন আৰ চিৰ তালিকাৰ ২০ শতাংশ কাষৰ আন জিলাৰ বিষয়া–কর্মচাৰীৰ জৰিয়তে পুনৰীক্ষণৰ কথা কৈছিল৷ ৰাজ্য চৰকাৰে এতিয়া ন্যায়ালয়ত সেই বিষয়টো উত্থাপন কৰিব আৰু ভুল লিগেচীৰে নাম অন্তর্ভুক্ত কৰাসকলক কেনেকৈ শাস্তি দিব পৰা যায়, সেই বিষয়টো অৱগত কৰিব৷ উচ্চতম ন্যায়ালয়ে যদি সংশোধন–পুনৰীক্ষণ্ নির্দেশ দিয়ে, চৰকাৰ সেই মতে অগ্রসৰ হ’ব৷ কিন্তু বর্তমানৰ এন আৰ চিখন ৰাজ্য চৰকাৰে কোনোপধ্যে মানি নলয়৷ এই এন আৰ চিক লৈ ৰাজ্য চৰকাৰ সন্তুষ্ট নহয়৷