নিয়মীয়া বার্তা, ২৮ ডিচেম্বৰ: স্বাস্থ্যখণ্ডত অতি দ্রুতগতিত আগবাঢ়িছে অসম৷ ২০১৮–১৯ আৰু ২০১৯–২০ বিত্তীয় বর্ষৰ তুলনামূলক বিশ্লেষণত ৰাজ্যৰ স্বাস্থ্যখণ্ডৰ এই ইতিবাচক দিশ বিচাৰি পাইছে নিটি আয়োগে৷ নিটি আয়োগে প্রকাশ কৰা ৰাজ্যভিত্তিক স্বাস্থ্য সূচকৰ চতুর্থ সংস্কৰণত দেখা গৈছে ২০১৮–১৯ বিত্তীয় বর্ষতকৈ ২০১৯–২০ বিত্তীয় বর্ষত অসমৰ স্বাস্থ্য খণ্ডত সামগ্রিকভাৱে ৪.৩৪ শতাংশ উন্নতি ঘটিছে৷ স্বাস্থ্যখণ্ডৰ আনুপাতিক উন্নয়নৰ হাৰত উত্তৰ প্রদেশৰ (৫.৫২) পাছত দেশৰ ভিতৰত দ্বিতীয় স্থান লাভ কৰিছে অসমে৷
উল্লেখ্য যে ২০১৮–১৯ বিত্তীয় বর্ষত স্বাস্থ্যখণ্ডত দেশৰ ১৯খন বৃহৎ ৰাজ্যৰ ভিতৰত অসমৰ স্থান আছিল ১৫ নম্বৰত৷ পিছে নিটি আয়োগৰ ২০১৯–২০ বিত্তীয় বর্ষৰ সমীক্ষাত দেখা গ’ল অসমে পূর্বৰ ১৫ নম্বৰ স্থানৰ পৰা ১২ নম্বৰ স্থানলৈ উন্নীত হৈছে৷ মন কৰিবলগীয়া যে তালিকাত ৩টা ঊর্ধ্বমুখী স্থান দখল কৰা দেশৰ একমাত্র ৰাজ্যখন হৈছে অসম৷ সেই হিচাপত স্বাস্থ্যখণ্ডত আটাইতকৈ উন্নীত ৰাজ্য হিচাপে অসমে বৃহৎ ৰাজ্যসমূহৰ ভিতৰত স্থান লাভ কৰিছে৷ উল্লেখ্য যে নিটি আয়োগে প্রকাশ কৰা তথ্য অনুসৰি বর্তমানে (২০১৯–২০) স্বাস্থ্যখণ্ডত অসমৰ সূচক হৈছে ৪৭.৭৪৷ ২০১৮–১৯ত আছিল ৪৩.৪০৷
আনহাতে দেশৰ ৮খন সৰু ৰাজ্যৰ ভিতৰত যোৱা এবছৰত স্বাস্থ্যখণ্ডত আটাইতকৈ উন্নতি সাধন কৰা ৰাজ্যখন হৈছে মিজোৰাম৷ মিজোৰামে ২০১৮–১৯ বিত্তীয় বর্ষতকৈ ২০১৯–২০ বিত্তীয় বর্ষত ৰাজ্যখনৰ স্বাস্থ্যখণ্ডত সামগ্রিকভাৱে ১৮.৪৫ শতাংশ উন্নতি ঘটিছে৷ কেন্দ্রীয়শাসিত ৰাজ্যসমূহৰ ভিতৰত দিল্লীয়ে আটাইতকৈ উন্নতি সাধন কৰাৰ লগতে ৯.৬৮ শতাংশ সূচক আগবাঢ়িছে৷ মন কৰিবলগীয়া যে স্বাস্থ্যখণ্ডৰ সার্বিক বিকাশত কেৰালা পূর্বৰ দৰে এতিয়াও বৃহৎ ৰাজ্যৰ তালিকাত প্রথম স্থান (৮২.২০) দখল কৰি ৰাখিছে৷ আনহাতে উত্তৰ প্রদেশে পূর্বতকৈ ২০১৯–২০ চনৰ স্বাস্থ্য সূচকত যথেষ্ট উন্নতি সাধন কৰিছে যদিও সামগ্রিকভাৱে ১৯খন বৃহৎ ৰাজ্যৰ তালিকাত সর্বনিম্ন (৩০.৫৭) স্থান দখল কৰিছে৷