লংকাৰ ওদালীত চিকিৎসকক আক্ৰমণৰ ঘটনাৰ সন্দৰ্ভত ২৪ আক্রমণকাৰীক গ্ৰেপ্তাৰ

নিয়মীয়া বাৰ্তা, ২ জুনঃ মহামাৰীৰ সময়ত দিনে–নিশাই ৰাইজৰ সেৱাত ব্রতী হৈ থকা চিকিৎসকক আক্রমণৰ ঘটনা সংঘটিত হৈছে হোজাই জিলাৰ লংকাৰ ফুলতলী ক’ভিড চিকিৎসালয়ত৷ এজন ক’ভিড ৰোগীৰ মৃত্যুক লৈ সৃষ্টি হোৱা উত্তপ্ত পৰিস্থিতিৰ পিছতে উক্ত চিকিৎসালয়খনৰ চিকিৎসক সেউজ কুমাৰ সেনাপতিক বর্বৰভাৱে আক্রমণ কৰে একাংশ উন্মত্ত লোকে৷ যাৰ বাবে গুৰুতৰভাৱে আঘাতপ্রাপ্ত হৈছে চিকিৎসক সেনাপতি৷

ইপিনে কর্মৰত অৱস্থাতে চিকিৎসকক আক্রমণৰ ঘটনাই ৰাজ্যজুৰি প্রতিক্রিয়াৰ সৃষ্টি কৰাৰ পিছতে এই ঘটনাত জড়িত ২৪ জন লোকক আৰক্ষীয়ে গ্রেপ্তাৰ কৰিছে বুলি জানিব পৰা গৈছে৷

আজি মুখ্যমন্ত্ৰী ড০ হিমন্ত বিশ্ব শৰ্মাই এক টুইটযোগে চিকিৎসক সেউজ কুমাৰ সেনাপতিক বর্বৰভাৱে আক্রমণ কৰা ২৪ জন লোকক গ্ৰেপ্তাৰ কৰা বুলি প্ৰকাশ কৰে।