নিয়মীয়া বাৰ্তা, ২৮ ফেব্ৰুৱাৰীঃ ৰাজ্যত নির্বাচনী আচৰণবিধি বলৱৎ হোৱাৰ লগে লগে কঠোৰ হৈছে নির্বাচন আয়োগ৷ বিশেষকৈ ৰাজনৈতিক দলৰ প্রচাৰ আৰু চৰকাৰী কাম–কাজৰ ওপৰত নির্বাচন আয়োগে তীক্ষ্ণ নজৰ ৰাখিছে৷ ইয়াৰ মাজতে কেইবাটাও নিযুক্তি পৰীক্ষা বাতিল কৰা হৈছে৷ আজি ৰাজ্য চৰকাৰৰ হস্ততাঁত–বস্ত্রশিল্প আৰু ৰেচম বিভাগৰ চতুর্থবর্গৰ বহুসংখ্যক পদৰ বাবে লিখিত পৰীক্ষা অনুষ্ঠিত হোৱাৰ কথা আছিল৷ ইয়াৰ বাবে প্রার্থীসকলে যাৱতীয় প্রস্তুতিও চলাইছিল৷
কিন্তু নির্বাচনী আচৰণবিধি বলৱৎ হোৱাৰ পৰিপ্রেক্ষিতত এই নিযুক্তি পৰীক্ষা বাতিল কৰা হয়৷ আনহাতে আজি হ’বলগীয়া বিশেষ টেট পৰীক্ষাও স্থগিত ৰাখিছে শিক্ষা বিভাগে৷ শিক্ষা বিভাগৰ আয়ুক্ত সচিব প্রীতম শইকীয়াই এই কথা জনাইছে৷
উল্লেখ্য যে শেহতীয়াকৈ বিভিন্ন বিভাগে নিযুক্তি সম্পর্কীয় বিজ্ঞাপন প্রকাশ কৰিছিল৷ কিন্তু কালি নির্বাচনী অধিসূচনা জাৰি তথা আচৰণবিধি বলৱৎ হোৱাৰ লগে লগে এই প্রক্রিয়াটো কার্যতঃ স্থবিৰ হৈ পৰিল৷