নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

আটাছুৰ নৱ নিৰ্মিত কাৰ্যালয় গৃহ তথা টাই সাংস্কৃতিক আৰু গৱেষণা কেন্দ্ৰ উদ্বোধন কৰিলে মুখ্যমন্ত্ৰীয়ে

নিয়মীয়া বাৰ্তা ১৭ জানুৱাৰীঃ মুখ্যমন্ত্ৰী ড॰ হিমন্ত বিশ্ব শৰ্মাই আজি গুৱাহাটী মহানগৰীৰ জয়ানগৰত সদৌ টাই আহোম ছাত্ৰ সন্থা [আটাছু]ৰ কেন্দ্ৰীয় কাৰ্যালয়ৰ নৱ নিৰ্মিত গৃহ তথা টাই সাংস্কৃতিক উন্নয়ন আৰু গৱেষণা কেন্দ্ৰ আনুষ্ঠানিকভাবে উদ্বোধন কৰে৷ মুখ্যমন্ত্ৰীয়ে টাই আহোম পৰম্পৰা অনুসৰি ‘বানফী’ পূজা আগবঢ়ায়৷

এই উপলক্ষে আয়োজিত সভাত ভাষণ প্ৰদান কৰি মুখ্যমন্ত্ৰীয়ে কয় যে ৰাজ্যখনৰ এক অগ্ৰণী ছাত্ৰ সংগঠন হিচাপে সদৌ টাই আহোম ছাত্ৰ সন্থাই ৰাজ্যখনৰ সামাজিক-সাংস্কৃতিক উত্তৰণৰ দিশত গুৰুত্বপূৰ্ণ অৰিহণা যোগাই আহিছে৷ স্বৰ্গদেউ চাউলুং চুকাফাৰ দিনৰে পৰা টাই আহোম সম্প্ৰদায়ে অসমীয়া জাতিৰ শক্তিশালীকৰণৰ দিশত উল্লেখযোগ্য অৱদান যোগাই আহিছে আৰু এই ক্ষেত্ৰত আটাছুৱে এই পৰম্পৰাক আগুৱাই নিয়াৰ দিশত অৰ্থৱহ ভূমিকা পালন কৰি আহিছে৷

টাই আহোম সম্প্ৰদায়ৰ সৰ্বাংগীন উন্নয়নৰ বাবে ৰাজ্য চৰকাৰ দায়বদ্ধ বুলি উল্লেখ কৰি মুখ্যমন্ত্ৰীয়ে কয় যে এই সম্প্ৰদায়ৰ সংস্কৃতি আৰু চহকী ঐতিহ্য সংৰক্ষণৰ বাবে ৰাজ্য চৰকাৰে বিভিন্ন প্ৰকল্প গ্ৰহণ কৰিছে৷ তেওঁ লগতে কয় যে ধেমাজি জিলাৰ হাবুঙত চলি থকা প্ৰকল্পটো আগন্তুক মে-ডাম-মেহ-ফিৰ সময়ত জনসাধাৰণৰ বাবে উৎসৰ্গিত কৰা হ’ব৷ আন এক প্ৰকল্প নাহৰকটীয়াৰ টিপামত গ্ৰহণ কৰা হ’ব বুলিও মুখ্যমন্ত্ৰীয়ে কয়৷ মুখ্যমন্ত্ৰীয়ে লগতে আশ্বাস প্ৰদান কৰি কয় যে আটাছুৰ নৱ নিৰ্মিত কাৰ্যালয়টোৰ অতিৰিক্ত কামৰ বাবে ৰাজ্য চৰকাৰে পুঁজি যোগান ধৰিব৷

আজিৰ এই অনুষ্ঠানত শিক্ষামন্ত্ৰী ডাঃ ৰণোজ পেগু, সাংস্কৃতিক পৰিক্ৰমা বিভাগৰ মন্ত্ৰী বিমল বৰা, আটাছুৰ কেন্দ্ৰীয় সমিতিৰ সভাপতি লিতুল বুঢ়াগোহাঁইকে ধৰি ছাত্ৰ সংগঠনটোৰ প্ৰাক্তন তথা বৰ্তমানৰ বিষয়ববীয়াসকল উপস্থিত থাকে৷

You might also like