নিয়মীয়া বাৰ্তা ২৫ ডিচেম্বৰঃ ৰাষ্ট্রীয় স্বাস্থ্য মিছন চমুকৈ এন এইচ এমৰ ঠিকাভিত্তিক কর্মচাৰীসকলৰ চাকৰিৰ কার্যকাল ৬০ বছৰলৈ বৃদ্ধিত অনুমোদন দিছে ৰাজ্য চৰকাৰে৷ যোৱা ২২ ডিচেম্বৰত মন্ত্রী পৰিষদৰ বৈঠকৰ এই সিদ্ধান্তক আদৰণি জনাইছে এন এইচ এম কর্মচাৰী সন্থাই৷ এক প্রেছ বিবৃতিত এন এইচ এম কর্মচাৰী সন্থাই মুখ্যমন্ত্রী সর্বানন্দ সোণোৱাল আৰু স্বাস্থ্যমন্ত্রী ড০ হিমন্ত বিশ্ব শর্মাক কৃতজ্ঞতা জ্ঞাপন কৰে৷ লগতে দেশৰ ভিতৰত অসমে এন এইচ এম কর্মচাৰীসকলৰ চাকৰিৰ কার্যকাল ৬০ বছৰলৈ বৃদ্ধি কৰাটো এক যুগান্তকাৰী পদক্ষেপ বুলি সন্থাই অভিহিত কৰিছে৷ পৰৱর্তী সময়ত এই সুবিধাবোৰ কর্মচাৰীসকলে যাতে সোনকালে লাভ কৰিব পাৰে, তাৰ প্রতি দৃষ্টি ৰাখিবলৈ কর্মচাৰী সন্থাই চৰকাৰক আহ্বান জনাইছে৷ ইফালে, অহা জানুৱাৰী মাহত এন এইচ এম কর্মচাৰী সন্থাই এখন জাতীয় অভিৱর্তন অনুষ্ঠিত কৰিব৷ এই অধিৱেশনত মুখ্যমন্ত্রী আৰু স্বাস্থ্যমন্ত্রী উপস্থিত থাকিব বুলি কর্মচাৰী সন্থাৰ সভাপতি ড০ মলয় কুমাৰ দাস আৰু ভাৰপ্রাপ্ত সাধাৰণ সম্পাদক ৰাজীৱ শইকীয়াই জানিবলৈ দিছে৷