নিয়মীয়া বাৰ্তা, ২০ ফেব্ৰুৱাৰীঃ ছাত্র–ছাত্রীৰ শিক্ষাৰ মান মূল্যায়নৰ লক্ষ্যৰে শিক্ষা বিভাগে পুনৰ আৰম্ভ কৰিব গুণোৎসৱ৷ অহা ২০ এপ্রিলৰ পৰা তিনিটা পর্যায়ত অনুষ্ঠিত হ’ব লগা এই গুণোৎসৱৰ বাবে অসম সর্বশিক্ষা অভিযান মিছনে প্রতিখন জিলাৰ শিক্ষা বিষয়ালৈ ইতিমধ্যে নির্দেশনা প্রেৰণ কৰিছে৷ সেই অনুসৰি প্রথম পর্যায়ত ১১খন জিলাক সামৰি ২০, ২১ আৰু ২২ এপ্রিলত অনুষ্ঠিত কৰা হ’ব গুণোৎসৱ৷ এই ১১খন জিলা হ’ল– বাক্সা, চিৰাং, ধুবুৰী, ডিমা হাছাও, হাইলাকান্দি, যোৰহাট, কামৰূপ (মেট্র’), লখিমপুৰ, শোণিতপুৰ, পশ্চিম কার্বি আংলং৷
আনহাতে, ২৫ এপ্রিলৰ পৰা ২৭ এপ্রিললৈ দ্বিতীয় পর্যায়ত সামৰি ল’ব লগা জিলাকেইখন হ’ল– বিশ্বনাথ, বঙাইগাঁও, চৰাইদেউ, দৰং, ধেমাজি, ডিব্রুগড়, গোৱালপাৰা, কার্বি আংলং, কৰিমগঞ্জ, নগাঁও আৰু নলবাৰী৷ একেদৰে ১০ মে’ৰ পৰা ১২ মে’লৈ তৃতীয় পর্যায়ত অনুষ্ঠিত হ’ব লগা এই গুণোৎসৱে সামৰি ল’ব বৰপেটা, কাছাৰ, গোলাঘাট, হোজাই, কামৰূপ, কোকৰাঝাৰ, মাজুলী, মৰিগাঁও, শিৱসাগৰ, দক্ষিণ শালমাৰা মানকাচৰ, তিনিচুকীয়া আৰু ওদালগুৰি৷ চলিত বর্ষত হ’ব লগা গুণোৎসৱৰ জৰিয়তে প্রথম শ্রেণীৰ পৰা নৱম শ্রেণীলৈ শিক্ষাৰ মান মূল্যায়ন কৰা হ’ব৷
মন কৰিবলগীয়া যে গুণোৎসৱৰ জৰিয়তে ইতিমধ্যে শিক্ষা বিভাগে ৰাজ্যৰ বহু বিদ্যালয়ৰ শিক্ষাৰ মান মূল্যায়ন কৰাৰ লগতে আন্তঃগাঁথনিৰ দিশো পৰীক্ষা কৰিবলৈ সক্ষম হৈছে৷ আনহাতে, গুণোৎসৱৰ জৰিয়তে স্কুল এৰা ছাত্র–ছাত্রীৰ সংখ্যাও হ্রাস কৰিবলৈ সক্ষম হৈছে শিক্ষা বিভাগে৷ ২০ এপ্রিলৰ পৰা ১২ মে’লৈ চলিব লগা এই গুণোৎসৱৰ জৰিয়তে বিদ্যালয় একত্রীকৰণৰ দিশটো পর্যবেক্ষণ কৰাৰ লগতে শিক্ষা বিভাগে শ্রেণীকোঠাৰ সংখ্যা বৃদ্ধিৰ লগতে পাঠ্যক্রমৰ বিভিন্ন দিশো পৰীক্ষা কৰিব৷