নিয়মীয়া বাৰ্তা ১০ আগষ্টঃ অবৈধ প্রেমিকাই শীতল মস্তিষ্কৰে হত্যা কৰিছিল তিনিচুকীয়াৰ ৱেব প’র্টেলৰ স্বত্বাধিকাৰ তথা সাংবাদিক ব্রীজেন দ্বীপক৷ ৬ আগষ্টৰ নিশা সাংবাদিকগৰাকীক নৃশংসভাৱে হত্যা কৰি মৃতদেহৰ সৈতে ওৰেনিশা কটোৱাৰ পাছত ৭ আগষ্টৰ পুৱাই ‘দিন–প্রতিদিন’ নামৰ প’র্টেলটোৰ কার্যালয় বীৰদর্পে ত্যাগ কৰিছিল হত্যাকাৰী আশল্টি বাগ (২৯) নামৰ এন আৰ এইচ এমৰ যুৱতী কর্মচাৰীগৰাকীয়ে৷ তিনিচুকীয়া সদৰ থানাত আজি সন্ধিয়া এখন সংবাদ মেলত অতিৰিক্ত আৰক্ষী অধীক্ষক ৰিপুঞ্জয় কাকতিয়ে সদৰী কৰা মতে, ফিল’বাৰী নিৱাসী স্বাস্থ্যকর্মী আশল্টি বাগে সাংবাদিকজনক হত্যা কৰা বুলি আৰক্ষীৰ জেৰাত স্বীকাৰ কৰিছে৷ কালি সাংবাদিকগৰাকীৰ মৃতদেহ উদ্ধাৰৰ পাছতেই নিশালৈ আৰক্ষীয়ে আশল্টি বাগ (২৯)ৰ লগতে ভনীয়েক নিতু বাগক আটক কৰিছিল৷ আৰক্ষীৰ জেৰাত আশল্টি বাগে নিজহাতে ব্রীজেন দ্বীপক হত্যা কৰা বুলি স্বীকাৰ কৰাৰ লগতে বহু তথ্যই প্রকাশ কৰিছে৷ ৬ আগষ্টৰ নিশা ‘দিন–প্রতিদিন’ৰ কার্যালয় কক্ষতে দুয়োজনৰ মাজত প্রথমে তর্কাতর্কি হৈছিল৷ ইয়াৰ পাছত ই হতাহতিত পৰিণত হয়৷ ইয়াৰ মাজতে আশল্টি বাগে সাংবাদিক ব্রীজেন দ্বীপক এডাল কেবলেৰে ডিঙিত চেপি ধৰাত সাংবাদিকজনৰ মৃত্যু হয়৷ আশল্টিয়ে নিশাটো উক্ত কোঠাতে কটাই পুৱাই নিজ গৃহলৈ যায়গৈ বুলি আৰক্ষীৰ আগত স্বীকাৰ কৰিছে৷ অৱশ্যে ক’ভিডৰ কর্তব্যত থকা আশল্টি বাগৰ সৈতে সাংবাদিকগৰাকীৰ কি সম্পর্ক আৰু কিয় হত্যা কৰিলে, সেই কথা আৰক্ষীয়ে প্রকাশ কৰাৰ পৰা বিৰত আছে৷ আনহাতে, হত্যাকাণ্ড সন্দর্ভত তিনিচুকীয়া সদৰ থানাত ৮৭৬/২০২০নং গোচৰ ৰুজু কৰি তদন্ত অব্যাহত ৰাখিছে আৰক্ষীয়ে৷ আৰক্ষীৰ আগত হত্যাকাৰী বুলি স্বীকাৰ কৰা ধৃত আশল্টি বাগক আদালতৰ পৰা পাঁচ দিনৰ জিম্মাত লোৱা বুলি প্রকাশ কৰিছে আৰক্ষীয়ে৷ আনহাতে, ব্রীজেন দ্বীপৰ সৈতে যুৱতীগৰাকীৰ কি সম্পর্ক আৰু হত্যাকাণ্ডৰ কাৰণ সন্দর্ভত আৰক্ষীয়ে তদন্তৰ খাতিৰত তথ্য প্রকাশ নকৰিলেও তিনি সন্তানৰ পিতৃগৰাকীৰ সৈতে প্রেমৰ সম্পর্ক থকাৰ সম্ভাৱনাকে সূত্রসমূহে প্রকাশ কৰিছে৷ এই ঘটনা অবৈধ প্রেমৰ কৰুণ পৰিণতি বুলিয়ে চর্চা হৈছে৷
চি বি আই তদন্তৰ দাবীৰে আটছাৰ ধর্ণা
কালি মৃতদেহ উদ্ধাৰ হোৱা ৱেব প’র্টেলৰ সাংবাদিক ব্রীজেন দ্বীপৰ হত্যাকাণ্ডৰ চি বি আই তদন্তৰ দাবীত আটছাৰ তিনিচুকীয়া সমিতিয়ে চহৰখনৰ থানা চাৰিআলিত ধর্ণা কার্যসূচী ৰূপায়ণ কৰে৷ হত্যাকাৰীক ফাঁচি দিয়াৰ লগতে সাংবাদিকগৰাকীৰ পৰিয়ালক ২০ লক্ষ টকা ক্ষতিপূৰণ দিবলৈ প্রশাসনক আটছাই দাবী জনাইছে৷