বিশেষ বাৰ্তা, ২১জুনঃ ডিব্ৰুগড়ত আৰক্ষী অধীক্ষকৰ নতুন অত্যাধুনিক কাৰ্যালয়টো কালি বিয়লি উদ্বোধন কৰা হয়। ডিব্ৰুগড়ৰ বিধায়ক প্ৰশান্ত ফুকনে চহৰখনৰ কেচি গগৈ পথৰ (ষ্টেট বেংকৰ সন্মুখত) থানা চাৰিআলি অঞ্চলত চহৰৰ মাজমজিয়াত নিৰ্মাণ কৰা নতুন ভৱনটো বিশ্বজিৎ পেগুৰ উপস্থিতিত উদ্বোধন কৰে। নগৰ আন্তঃগাঁথনি উন্নয়ন পুঁজিৰ অধীনত তিনি কোটি টকা ব্যয়সাপেক্ষে নিৰ্মাণ কৰা হৈছে এই আটকধুনীয়া দুমহলীয়া ভৱনটো। ইফালে, এ টি ৰোডৰ ব্ৰহ্মপুত্ৰৰ পাৰত ডিব্ৰুগড় টাউন প্ৰটেকচন ডাইকৰ সমীপত থকা পুৰণি এছ পি কাৰ্যালয়টো জুলাই মাহত সম্পূৰ্ণৰূপে নতুন ভৱনলৈ স্থানান্তৰ কৰা হ’ব বুলি আৰক্ষী অধীক্ষক শ্বেতাংগ মিশ্ৰই জানিবলৈ দিয়ে। বাৰিষাৰ সময়ত সঘনাই কাৰ্যালয়টো পানীত বুৰ যোৱা বাবে পুৰণি এছ পি কাৰ্যালয়টো নতুনকৈ নিৰ্মাণ কৰা কাৰ্যালয়টোৰ পৰা প্ৰায় ১ কিলোমিটাৰ দূৰত অৱস্থিত আছিল। ডিব্ৰুগড়ৰ আৰক্ষী অধীক্ষক শ্বেতাংগ মিশ্ৰই কয়- “যিহেতু নতুন অট্টালিকাটো সম্পূৰ্ণৰূপে সমাপ্ত হোৱা নাই, গতিকে জুলাই মাহতহে নতুন ভৱনলৈ কাৰ্যালয় স্থানান্তৰ কৰা হব।ইতিমধ্যেই প্ৰথম পৰ্যায়ৰ কাম সম্পূৰ্ণ হৈছে। দ্বিতীয় মহলা আৰু বাউণ্ডেৰী ৱালৰ কাম দ্বিতীয় পৰ্যায়ত কৰা হ’ব। পুৰণি কাৰ্যালয়টোত বৰষুণৰ সময়ত সঘনাই পানী আবদ্ধ হৈ কাম-কাজত বাধাৰ সৃষ্টি কৰাৰ লগতে জনসাধাৰণৰ বাবেও বহু আহুকাল হৈছিল। এতিয়া সেই সমস্যা সমাধান হ’ব। নতুন ভৱনটো বিশাল আৰু চহৰৰ মাজমজিয়াত অৱস্থিত হোৱা বাবে সকলো জনসাধাৰণৰ বাবে সুবিধা হোৱাৰ লগতে সমগ্ৰ ব্যৱস্থা ডিজিটেলাইজ কৰা হ’ব বুলিও আৰক্ষী অধীক্ষক শ্বেতাংগ মিশ্ৰই উল্লেখ কৰে।আনহাতে, চহৰৰ প্ৰাণকেন্দ্ৰ থানা চাৰিআলিৰ দৰে অতি ব্যস্ত অঞ্চলত ইমান গুৰুত্বপূৰ্ণ কাৰ্যালয় এটা স্থাপনে ভবিষ্যতে যান-জঁটৰ ক্ষেত্ৰত কি ভয়াৱহ ৰূপ ধাৰণ কৰিব,সেয়া লক্ষণীয় হব।
প্ৰেৰক বিভাস দুৱৰা