চৰকাৰী বন্ধৰ দিনাও শিক্ষা সেতু এপত উপস্থিতি দিবলৈ বিভাগীয়ভাৱে বার্তা প্রেৰণ কৰা কার্যই ৰাজ্যৰ শিক্ষক সমাজক স্তম্ভিত কৰি তুলিছে৷ মহাপুৰুষ শ্রীমন্ত শংকৰদেৱৰ তিৰোভাৱ তিথি উপলক্ষে আন চৰকাৰী কার্যালয়ৰ দৰে শিক্ষানুষ্ঠানসমূহো বন্ধ আছিল যদিও বিভাগীয়ভাৱে শিক্ষকসকলক শিক্ষা সেতু এপত উপস্থিতি দিবলৈ ম’বাইলযোগে বার্তা প্রেৰণ কৰা হৈছিল৷
এই সন্দর্ভত প্রতিক্রিয়া প্রকাশ কৰি সদৌ অসম সন্মিলিত শিক্ষক মঞ্চৰ মুখ্য সম্পাদক উৎপল চক্রৱর্তীয়ে কয় যে বন্ধৰ দিনত শিক্ষা সেতুত উপস্থিতি দিবলৈ বার্তা প্রেৰণ কৰা কার্যই পুনৰ এপটোৰ বিসংগতি উন্মোচন কৰিলে৷ শিক্ষা সেতু এপত থকা বিসংগতি নিৰাময় কৰিবলৈ দীর্ঘদিন ধৰি উত্থাপন কৰি অহা দাবী দোহাৰি চক্রৱর্তীয়ে কয়– শ্রীমন্ত শংকৰদেৱৰ তিৰোভাৱ তিথি উপলক্ষে ৰাজ্য চৰকাৰৰ বন্ধৰ দিন আছিল৷ সেয়েহে শিক্ষানুষ্ঠানসমূহত স্বাভাৱিকভাৱে শিক্ষক, শিক্ষার্থী অনুপস্থিত আছিল৷
কিন্তু আশ্চর্যকৰ বিষয়টো হৈছে বিদ্যালয় প্রধানসকলক সমগ্র শিক্ষা মিছনৰ পৰা শিক্ষক–শিক্ষার্থীৰ উপস্থিতি দিবলৈ বার্তা প্রেৰণ কৰা হ’ল৷ দুবাৰকৈ ৰাষ্ট্রীয় বঁটাৰে পুৰস্কৃত শিখা সেতু এপৰ অপাৰ মহিমাই আমাক স্তম্ভিত কৰিছে৷ ইফালে শিক্ষা সেতু এপৰ বিসংগতি চিনাক্ত কৰি ত্রুটিমুক্ত কৰিবলৈ ৰাজ্য চৰকাৰে গঠন কৰা বিশেষজ্ঞ সমিতিৰ প্রতিবেদন ৰাজহুৱা কৰিবলৈ তেওঁ দাবী উত্থাপন কৰে৷
এই প্রসংগত চক্রৱর্তীয়ে কয় যে বিশেষজ্ঞ সমিতিৰ প্রতিবেদন আজিও ৰাজহুৱা নহ’ল৷ তাৰ পৰিৱর্তে নিত্য নতুন বিসংগতি ধৰা দিছে৷ আনহাতে, আর্জিত ছুটী, অনুকম্পামূলক ছুটী, চিকিৎসাজনিত ছুটী, পিতৃ–মাতৃৰ বিয়োগত বিশেষ ছুটীকে ধৰি শিক্ষকসকলৰ সমস্যা শীঘ্রে সমাধান কৰিবলৈ তেওঁ দাবী জনায়৷ চক্রৱর্তীয়ে কয় যে উক্ত সমস্যাসমূহ সমাধান কৰা হ’ব বুলি একাধিকবাৰ ৰাজহুৱাকৈ ঘোষণা কৰা হৈছে৷ কিন্তু চূড়ান্ত কার্যকৰী সিদ্ধান্ত গ্রহণ কৰা নহ’ল৷ শিক্ষকৰ চাকৰিকাল ৬২ বছৰলৈকে বৃদ্ধি, খালী পদ পূৰণ আদি সমস্যাও সমাধান কৰা উচিত৷
Niyomiya Barta Desk, 27 August