নিয়মীয়া বাৰ্তা ২৯ অক্টোবৰঃ অসম আৰক্ষীৰ উপ–পৰিদর্শক (এছ আই) নিযুক্তি কেলেংকাৰিৰ অন্যতম অভিযুক্ত আৰক্ষী অধীক্ষক কুমাৰ সঞ্জীত কৃষ্ণসহ মুঠ ১৩গৰাকী অভিযুক্তই জামিন বিচাৰি উচ্চ ন্যায়ালয়ৰ দ্বাৰস্থ হৈছে৷ কৰিমগঞ্জৰ প্রাক্তন আৰক্ষী অধীক্ষক সঞ্জীত কৃষ্ণই চিআইডিত ৰুজু হৈ থকা ২১/২০২০ নম্বৰৰ গোচৰত জামিন বিচাৰিছে৷ একেটা গোচৰত দেৱজিৎ দাস, তাৰিণীকান্ত বাণিক্য, দিলীপ গগৈ, হীৰকজ্যোতি বৰুৱা, মৃণাল কুমাৰ নাথ, প্রিয়নাথ গগৈ, মহম্মদ আনোৱাৰ আলী, প্রদীপ মজুমদাৰেও জামিন বিচাৰি আবেদন দাখিল কৰিছে৷ ইফালে, জামিন বিচাৰি উচ্চ ন্যায়ালয়ত মুখ থেকেচা খাইছে থেংক ইউ লজৰ স্বত্বাধিকাৰী অলকেশ বৈশ্যই৷ ইতিমধ্যে তেওঁৰ জামিন নাকচ কৰিছে ন্যায়ালয়ে৷ ক্রাইম ব্রাঞ্চত ৰুজু হৈ থকা ১৮/২০২০ নম্বৰ গোচৰত জামিন বিচাৰিছিল বৈশ্যই৷ ক্রাইম ব্রাঞ্চৰ গোচৰটোত জামিন বিচাৰি আদালতৰ দ্বাৰস্থ হৈছে যোগমায়া ব্রহ্ম আৰু বিমল থাপাও৷ শীঘ্রে এই আবেদনসমূহৰ শুনানি গ্রহণ কৰাৰ সম্ভাৱনা আছে ন্যায়ালয়ে৷ উল্লেখ্য যে অসম আৰক্ষীৰ উপ–পৰিদর্শক নিযুক্তি কেলেংকাৰিত প্রাক্তন ডিআইজি পি কে দত্ত, বিজেপি নেতা দিবন ডেকা, প্রাক্তন আৰক্ষী অধীক্ষক সঞ্জীত কৃষ্ণকে ধৰি বহুসংখ্যক লোকক গ্রেপ্তাৰ কৰা হৈছে৷ ইফালে, বিজেপি নেতা দিবন ডেকাই তেওঁৰ বিৰুদ্ধে চি আই ডি আৰু ক্রাইম ব্রাঞ্চত ৰুজু হৈ থকা গোচৰত নিম্ন আদালতত জামিন আবেদন দাখিল কৰিছে৷