নিয়মীয়া বার্তা, ঢকুৱাখনা, ২৬ এপ্ৰিল : সাতামপুৰুষীয়া ঐতিহ্য আৰু পৰম্পৰাৰ সমাহাৰ ঘটাই অহা ৮ মে’ৰ পৰা তিনিদিনীয়া বৰ্ণিল কাৰ্যসূচীৰে চাৰিকড়ীয়া নৈৰ পাৰৰ ম’হঘুলি চাপৰিত উদযাপন কৰা হ’ব ঢকুৱাখনাৰ ঐতিহ্যমণ্ডিত ফাটবিহু। আহোম ৰাজত্ব কালৰে পৰা নিজস্ব বৈশিষ্ট্য আৰু স্বকীয় পৰম্পৰাৰে উদযাপিত হৈ অহা ঢকুৱাখনাবাসীৰ স্বাভিমানস্বৰূপ তথা ৰাজ্যৰ সাংস্কৃতিক জগতৰ একক আৰু অনন্য লোকউৎসৱ ফাটবিহু-২০২৬ বৰ্ষ সফল উদযাপনৰ বাবে ব্যাপক তৎপৰতা আৰম্ভ কৰিছে ফাটবিহু সমিতি আৰু উদযাপন সমিতিয়ে।
ঢকুৱাখনাৰ আয়ুসৰেখাস্বৰূপ চিৰপ্ৰবাহিত চাৰিকড়ীয়া নৈৰ উত্তৰপাৰে অৱস্থিত ম’হঘুলি চাপৰিৰ ৩৭ বিঘা মাটিৰে পৰিবেষ্টিত ফাটবিহু বাকৰিক সজাই-পৰাই তুলিছে ন-ৰূপত। ফাটবিহু ২০২৬ বৰ্ষ উদযাপনৰ বাবে ইতিমধ্যে হেমন্ত গগৈক সভাপতি, চন্দ্ৰজিত শইকীয়াক সম্পাদক আৰু মিনু দাস বৰা, অৰুণ চমুৱা আৰু নীলোৎপল দেৱগোস্বামীক উপ-সভাপতি, আশিস কুমাৰ দাস, অশোক বৰুৱাক সহকাৰী সম্পাদক হিচাপে লৈ এখন শক্তিশালী উদযাপন সমিতি গঠন কৰা হৈছে।
ফাটবিহু সমিতিয়ে জনোৱা অনুসৰি, ৮ মে’ৰ পুৱা ৯ বজাত পতাকা উত্তোলনেৰে ফাটবিহু ২০২৬ বৰ্ষৰ তিনিদিনীয়া বর্ণিল কাৰ্যসূচীৰ পাতনি মেলিব ফাটবিহু সমিতিৰ সভাপতি বসন্ত শইকীয়াই।ইয়াৰ পিছতে স্মৃতি তৰ্পণ কৰিব উদযাপন সমিতিৰ সভাপতি হেমন্ত গগৈয়ে। পুৱা ১১.৩০ বজাত মঞ্চ মুকলি কৰিব প্ৰবীণ সাংবাদিক কুশল গগৈয়ে। দুপৰীয়াৰ পৰা অনুষ্ঠিত হ’ব লগা মহিলাসকলৰ টকা বিহু প্রতিযোগিতা উদ্বোধন কৰিব তেজপুৰৰ বিহুৱতী অৰূপা বৰুৱাই। বিয়লিলৈ চেমনীয়া হুঁচৰি প্ৰতিযোগিতা।
দ্বিতীয় দিনা অৰ্থাৎ ৯ মে’ৰ কাৰ্যসূচী অনুসৰি পুৱা কপৌফুল আৰু গছপুলি ৰোপণ। ইয়াৰ পিছতে অনুষ্ঠিত হ’ব গামোচা প্রতিযোগিতা। ১১.৩০ বজাত অসমীয়াৰ প্ৰাণৰ শিল্পী জুবিন গাৰ্গ আৰু সুধাকণ্ঠ ড° ভূপেন হাজৰিকাৰ প্ৰতিমূৰ্তি উন্মোচন অনুষ্ঠান। দুপৰীয়ালৈ ফাটবিহুৰ মূল মঞ্চত অনুষ্ঠিত হ’ব পূর্ণবয়স্ক হুঁচৰি প্ৰতিযোগিতা। সকলো জাতি-জনগোষ্ঠীৰ বাবে মুকলি থকা পূৰ্ণবয়স্ক হুঁচৰি প্ৰতিযোগিতাখন উদ্বোধন কৰিব অসম চৰকাৰৰ সাংস্কৃতিক সঞ্চালকালয়ৰ অৱসৰপ্ৰাপ্ত উপ-সঞ্চালক ড° পবিত্ৰ কুমাৰ পেগুৱে। বিয়লি ১ বজাত ফাটবিহুৰ বছৰেকীয়া প্রকাশ ‘বিহুৱান’ উন্মোচন। প্ৰাণৰ শিল্পী জুবিন গাৰ্গ বিশেষ এই বৰ্ষৰ ‘বিহুৱান’ উন্মোচন কৰিব বোকাখাত জেডি এছ জি মহাবিদ্যালয়ৰ অধ্যক্ষ ড° জয়ন্ত গগৈয়ে।
তৃতীয় তথা অন্তিম দিনা পুৱা ১০ বজাত সাংস্কৃতিক শোভাযাত্রা। সাংস্কৃতিক শোভাযাত্রা উদ্বোধন কৰিব জনপ্ৰিয় কণ্ঠশিল্পী তথা অভিনেত্ৰী দীপলিনা ডেকাই। দুপৰীয়া ১২ বজাত ফাটবিহুৰ মুখ্য আকৰ্ষণ মুকলি বিহু প্রতিযোগিতা। শতাধিক বিহু দলে অংশগ্ৰহণ কৰিবলগীয়া মুকলি বিহু প্রতিযোগিতাখন উদ্বোধন কৰিব জ্যেষ্ঠ বিহুৱা নিৰঞ্জন গগৈয়ে। বিয়লি ২ বজাৰ পৰা ফাটবিহু সমিতিৰ সভাপতি বসন্ত শইকীয়াৰ সভাপতিত্বত অনুষ্ঠিত হ’ব মুকলি সভা। অসম সাহিত্য সভাৰ সভাপতি ড° বসন্ত গোস্বামীয়ে উদ্বোধন কৰিবলগীয়া মুকলি সভাত মুখ্য অতিথি হিচাপে অংশগ্ৰহণ কৰিব কেন্দ্ৰীয় মন্ত্ৰী সৰ্বানন্দ সোণোৱালে। মুকলি সভাত শিক্ষামন্ত্ৰী ডা: ৰণোজ পেগু, লখিমপুৰৰ সাংসদ প্রদান বৰুৱা, ঢকুৱাখনাৰ বিধায়ক নৱ কুমাৰ দলে, সৰুপথাৰৰ বিধায়ক বিশ্বজিৎ ফুকনে বিশিষ্ট অতিথি হিচাপে অংশগ্ৰহণ কৰিব ।
লোকসংস্কৃতিৰ গৱেষক ড° পুষ্প গগৈয়ে নিৰ্দিষ্ট বক্তাৰূপে উপস্থিত থাকিবলগীয়া মুকলি সভাখনত গিৰিজা নন্দ চৌধুৰী বিশ্ববিদ্যালয়ৰ উপাচাৰ্য ড° কন্দৰ্প দাস, অসম বিধানসভাৰ সচিব দুলাল পেগু, সদৌ অসম ছাত্ৰ সন্থাৰ সভাপতি উৎপল শৰ্মাকে ধৰি আন কেইবাজনো গণ্যমান্য ব্যক্তি উপস্থিত থাকিব। ফাটবিহুৰ তিনিওটি দিনৰ কাৰ্যসূচীত ৰাজ্যবাসীৰ সহায়-সহযোগিতা কামনা কৰি জাতীয় সাজপাৰ পৰিধান কৰি ফাটবিহু উপভোগ কৰিবলৈ আহ্বান জনাইছে উদযাপন আৰু ফাটবিহু সমিতিয়ে।